Горештините нема да попуштат
Во Македонија топлото време ќе се задржи и денеска, а живата во термометрите до четириесеттиот Целзиусов степен ќе се искачи во југоисточните подрачја. Влажна маса од северозапад во текот на утрешниот ден ќе услови нестабилно време со дожд и грмежи, но присуството на јужен ветер се' уште ќе ги одржува високи дневни температури помеѓу 30 и 37 степени. Од Управата за хидрометеоролошки работи велат дека мало освежување ќе следува задутре и дневните температури ќе се спуштат до 34. степен. Слично ќе биде и в понеделник, а потоа до 22 август Македонија повторно ќе биде под влијание на топол воздух и температури до 40-от степен. Температурите ќе опаднат пред крајот на август, кога ќе има почести врнежи од дожд.
„Утре температурите ќе опаднат за два до три степена и нема да бидат повисоки од 37. степен. Северното струење задутре ќе ги спушти утринските температури помеѓу 11 и 18 степени, а во текот на денот живата ќе се искачи до 34-от степен“, вели Рада Аврамовска, раководител на Одделението за анализа и прогноза во УХМР.
Од вторник повторно ќе биде топло и спарно. Промена на временската состојба ќе следува по 22 август, кога ќе настапи заладување. (Сн.К.) |
