Блејк го урна олимпискиот сон на Федерер
Сега, останува да се види како сето ова ќе влијае врз него пред Ју - Ес опен, што се игра на крајот од овој месец
Се' уште светскиот рекет број 1 Роже Федерер доживеа шокантна елиминација во Пекинг од Американецот Џејмс Блејк 4:6, 6:7. Со тоа Швајцарецот ги уништи очекувањата на светската тениска јавност дека во Пекинг ќе гледа реприза на епскиот вимблдонски меч против Рафаел Надал, кој во понеделник официјално го презема првото место на АТП листата.
Ретко кој очекуваше ваков епилог на настаните, особено не против Блејк, кој важи за традиционален „американски пациент“ на Федерер. Имено, Американецот во нивните досегашни осум дуели има освоено само еден сет! Но сега беше поинаку. Публиката тотално замолкна, кога Блејк направи брејк во десетиот гем, со што навести големо изненадување, потврдено во тај-брејкот во вториот сет. Блејк, седмиот тенисер на ранг листата, умешно ја искористи слабата игра на Федерер и многуте неизнудени грешки, кои дојдоа како резултат на неговата слаба концентрација.
Инаку, Федерер, кој и во третата своја Олимпијада останува со празни раце, во претходните два меча одигра одлично не губејќи ниту еден сет против Аравел, Турсунов и Бердих. Во тие дуели, особено против Бердих, кој го елиминираше во Атина 2004 уште во второто коло, покажа дека е во добра форма и дека има огромна желба за златниот медал, која беше потврдена со неговата одлука да се пресели од Олимпиското село во хотел во Пекинг, со цел да може подобро да се сконцентрира. Во селото не можеше глава да крене од останатите спортисти, кои постојано сакаа да се фотографираат со него. Но очигледно ниту хотелскиот комфор не ги излечи неговите фрустрации од слабата сезона. Сигурно е дека и заморот го прави своето. Федерер по победата над Бердих се пожали на згуснатата програма, велејќи дека „не ми е јасно зошто ваков турнир не се игра 10 дена, мислам дека се бара премногу од нас“.
Сега, останува да се види како сето ова ќе влијае врз него пред настапот на Ју - Ес опен, кој се игра на крајот од овој месец. |
