Борачот Ара Абрхамјан го фрли медалот!
Швеѓанецот ја симна бронзата од вратот и ја фрли на душекот, лут за судењето во полуфиналето
Шведскиот борач Ара Абрахамјан го фрли својот бронзен медал во грчко-римски стил во знак на протест откако неговиот обид за освојување на олимпиското злато заврши со одлука на судиите, која тренерот на Швеѓаните ја нарече „политика“. Абрахамјан ја симна бронзата од вратот за време на церемонијата на доделувањето на медалите, се симна од пиедесталот, го фрли медалот среде душекот и си замина.
„Не ми е гајле за овој медал! Сакав злато“, изјави тој.
Огорчениот Абрахамјан, вицешампион од Атина 2004, кој имаше огромна амбиција за освојување на најблескавото парче метал во категоријата до 84 кг во Пекинг, објави дека се повлекува од спортот.
„Ова ми беше последниот меч. Сакав да го освојам златото, па оваа Олимпијада ја сметам за неуспех“, додаде тој.
Репрезентативните колеги претходно мораа да го смируваат шведскиот борач по расправијата со судиите за нивната одлука во полза на Италијанецот Андреа Мингуци во полуфиналето. Абрахамјан врескаше по судиите и по службените лица и потоа отиде до нивните седишта за да им каже што има в лице. Тој бесно ја отфрли раката на претставникот на својот тим, кој се обиде да го смири, се заврте и си отиде.
Шведските навивачи со гласни извици негодуваа додека судиите ја напуштаа арената. Нивниот миленик не им изјави ништо на новинарите што го чекаа, но затоа со тупаница силно ја удри алуминиумската ограда на излегување од салата.
Абрахамјан подоцна објасни дека бил уверен оти неговиот пораз од подоцнежниот освојувач на златниот медал Мингуци е „тотално неправеден“. Борачот изјави дека неговите пријатели му се јавиле 20 минути пред борбата за бронзениот медал и го убедувале да се натпреварува.
„Заклучив дека отидов предалеку и не сакав да им попуштам, па решив да се борам“, појасни тој.
Шведскиот селектор Лео Милари изјави: „Сето ова е политика“. Тој не одговори дали ќе вложат и формален протест за одлуката на членовите на судиското жири Жан-Марк Пето од Швајцарија и Ли Роналд Меккеј од Канада и на судијата на душек Гилјермо Орестес Молина од Куба.
Новиот олимписки првак, кој ја бакна кинеската носителка на медалите по примањето на своето злато, изјави дека гестот на Абрахамјан имал за цел да му ја расипе церемонијата на прогласувањето на победниците.
„Секако дека некој секогаш ќе ги проблематизира судиските одлуки, но во спортот е соодветно и пожелно да се покаже џентлменство и да се прифати резултатот“, изјави Мингуци.
Интернационалниот олимписки комитет соопшти дека го истражува случајот заедно со светската боречка федерација ФИЛА, за која Абрахамјан вели дека „не игра фер“.
„Во контакт сме со ФИЛА за да ги утврдиме вистинските факти“, изјави портпаролката на ИОК, Емануела Моро. |
