По четири години Валднер ќе замине од „ЕВН Македонија“

Во „ЕВН Македонија“ наскоро ќе дојде до смена на раководството. По истекот на 4-годишниот мандат, во април 2010 година, според вчерашната одлука на Надзорниот одбор, претседателот на Управниот одбор, Георг Валднер и заменик-претседателотот Карл Хајнц Грасман, ќе им се посветат на нови работни задачи во концернот ЕВН.

Во меѓувреме, ќе биде назначено ново раководство кое дополнително ќе биде објавено од Надзорниот одбор.

Петер Лаер, претседателот на Надзорниот одбор на „ЕВН Македонија“ и заменик-претседател на УО во ЕВН АГ изјави: „Сакам да ја искористам оваа пригода им да се заблагодарам на досегашните членови на УО за нивниот особен ангажман во изминатите години и за успешното реорганизирање на компанијата. По успешната реконструкција и интеграција, ЕВН очекува натамошен континуитет во работењето во Македонија“.

Според Георг Валднер, во изминатите години биле остварени сите предуслови за успешна иднина на „ЕВН Македонија“. Тој на наследниците им посака голем успех и се' најдобро.

Со околу 2.700 вработени, мрежа во должина од 25.000 км и со околу 800.000 потрошувачи на територијата, „ЕВН Македонија“ е водечко претпријатие за снабдување со електрична енергија, информираа од компанијата. Произлезе од некогашното државно АД ЕСМ и во изминатите три и пол години преброди радикален период на санирање и реструктуирање. Денес стана интегрален дел од Групацијата ЕВН – водечка австриска компанија за енергија и животна средина.

По реализација на најголемата инвестициска програма во историјата од 120 мил. евра, преку инвестиции во мрежа, во нови технологии, модерна инфраструктура и Центар за односи со потрошувачи, како и преку комплетна рехабилитација на 11 хидроцентрали, „ЕВН Македонија“ денес се вбројува во претпријатија - предводници во регионот. (Ек.Р.)