Претходен број

Опозицијата се подели околу Владата

За СДСМ иницијативата е непотребна, ВМРО-ДПМНЕ обвинува за дестабилизација

Светлана Унковска

Претседателот на НСДП, Тито Петковски, очекува до понеделник премиерот Никола Груевски да најави формирање влада на национално единство. Во спротивно, тој рече дека заедно со другите опозициони партии во Собранието ќе покрене иницијатива за гласање доверба на Владата.

На барањата на Петковски, ВМРО-ДПМНЕ веднаш излезе со реакција, обвинувајќи дека сето ова е дел од сценариото на опозицијата за дестабилизирање на земјава. СДСМ не се согласува со предлогот на НСДП, оценувајќи го како контрапродуктивен.

„Директно се обраќаме до премиерот Груевски, со намера тоа да го прифати како патриотски чин, кој оди во насока на градење политички консензус за фундаменталните прашања. Доколку Груевски не го прифати предлогот до понеделник, во парламентот ќе покренеме иницијатива за гласање доверба на Владата“, најави Петковски, кој со доза на цинизам додава дека на „премиерот нема да му недостасува ништо, освен суетата“. Тој предлага на чело на преодната влада да биде поставена непартиска личност, но би прифатил дури и Груевски да остане на премиерската функција.

Според Петковски, иницијативата за Влада на национално единство е повеќе од потребна затоа што Македонија моментно изгледа многу несериозно во очите на меѓународната заедница.

„Со оставката на Боцевски се остава впечаток дека државата не е подготвена да ги исполни реформите и барањата кои се услов за напредок на патот кон Европа. Исто така, политиката на Груевски ја води земјава во се' поголема изолација, наместо да се подобруваат, се расипуваат односите со соседите, на внатрешен план има колапс на економијата, рецесијата тропа на врата, а вработувања има само во администрацијата и тоа на партиски активисти на ВМРО-ДПМНЕ“, вели Петковски. Прашан дали за ваквата иницијатива веќе разговарал, односно добил поддршка и од парламентарните партиите на Албанците во Собранието, тој рече дека засега не се договарал со ниту една партија, но оти очекува опозицијата да се обедини и заедно во Собранието да и' изгласаат недоверба на Владата.

Но, од најголемата опозициона партија СДСМ веднаш пристигна „ладен туш“ за Петковски, отфрлајќи ја иницијативата.

„СДСМ не беше информиран за ова и во овој момент иницијативата ја сметаме за крајно несоодветна и несериозна. ВМРО-ДПМНЕ е носител на апсолутната власт во оваа држава и тоа на сите нивоа и во овој период, таа, а не опозицијата мора да изнајде начин за излез од оваа сериозна политичка и економска криза во која се наоѓа Македонија. Какви било дебати за влада на национален спас се контрапродуктивни и се напразно трошење време“, вели во изјавата Зоран Заев, потпретседател на СДСМ.

Истовремено, ВМРО-ДПМНЕ излезе со оцена дека иницијативата на Петковски е само дел од сценариото на опозицијата за дестабилизирање на земјава, но оти не знае кои се спонзорите на сето ова.

„Го повикуваме Петковски, кој прв го започна реализирањето на ова сценарио, да ги соопшти спонзорите. Ние подолго време најавуваме дека во Македонија се работи на сценарио за нарушување на меѓуетничките односи и за дестабилизација внатре во владината коалиција. Играчите на ова сценарио се предводени од СДСМ, потоа од партија, поранешен коалиционер на ВМРО-ДПМНЕ и од една албанска партија“, истакна Димовски во својата реакција.