Пропадна и вториот обид за тестирање во Mедицинско
Повеќе од стотина родители и ученици Албанци протестираа стоејќи на скалите на „Панче Караѓозов“
Жаклина Хаџи-Зафирова
По втор пат вчера пропадна обидот за квалификационо тестирање на учениците Албанци во средното медицинско училиште „Панче Караѓозов“. Повеќе од стотина родители и ученици Албанци протестираа стоејќи наредени на скалите од „медицинското“ училиште, со што се спротивставија на обидот да се оствари тестирањето за да можат да се рангираат учениците за упис во медицинските струки. Од Министерството за образование и наука вчера порачаа дека ќе нема отстапки од конкурсот. Поради ова, родителите порачаа дека повторно ќе протестираат в понеделник, ако викендов нема конкретно решение.
Родителите се повикуваа на Законот за задолжително средно образование, односно дека им дозволува децата да се запишат таму каде што сакаат. Тие тврдат дека министерот за образование Перо Стојановски им ветил осум паралелки во „медицинско“.
„Законот ни дозволува овие деца да влезат во ова училиште без никаков тест, бидејќи бројот не го надминува составот на осум паралелки што ни беше понудено од Министерството, иако сега сите демантираат“, изјави вчера родителот Енвер Мифтари, кој додаде дека за случајот ги информирале сите странски амбасади, како и шефот на државава и премиерот. Родителите сметаат дека сите 260 деца, кои се со сите петки, имаат право без тестирање да влезат во осумте ветени паралелки во медицинското училиште.
Протестот се растури откако кај насобраните лица се појавија двајца пратеници од ДУИ, меѓу кои и Сафет Незири, кој им пренел дека учениците, сепак, треба да поминат низ квалификационо тестирање.
„Родителите не дозволуваат учениците да полагаат. Тоа значи дека и во второто пријавување од првиот уписен рок не се запишани ученици“, изјави вчера раководителот за основно и средно образование, Љупчо Спасовски. Тој повтори дека во медицинското училиште ќе има пет паралелки, како што е предвидено во конкурсот. Спасовски најави дека ќе бидат запишани 170 ученици, а не 260 како што се бара. „Ќе ги запишеме учениците бидејќи Законот дозволува дополнителни критериуми, а какви ќе видиме во Министерството“, изјави тој, додавајќи дека не прават дискриминација. Според него, некои деца утрото се обиделе да полагаат, но, биле спречени од нивните родители, за кои изрази жалење, бидејќи некои од нив биле наставници.
Од Министерството вчера испратија соопштение во кое нагласија дека остануваат на ставот дека нема да се зголеми бројот на паралелки во „Панче Караѓозов“. Според нив, во ова училиште се' уште има 170 слободни места за настава на албански јазик.
„Министерството нема да дозволи 170 ученици, да бидат над Законот и Уставот, во кој изрично стои дека сите граѓани се еднакви, во однос на 21.575 ученици, кои се пријавија и запишаа во прва година во првиот уписен рок“, се вели во соопштението на МОН. Министерството појаснува дека квалификационо тестирање има во сите училишта каде што бројот на ученици со еднаков успех е поголем од бројот на слободните места.
Од Нова демократија вчера ја критикуваа работата на заменик- министерката за образование, Линдита Ќазими, која, според нив, треба да се залага да се задржи непроменет бројот од осум паралелки на албански јазик, колку што имало лани. |
