Напад со нож, искорнат семафор и тотален хаос во базен во Атина
Проблемите што Македонија го има со навивачите се чинат толку мали во споредба со оние што се случија викендот во Грција. Во саботниот ватерполо натпревар меѓу Олимпијакос и Панатинаикос хулиганите тепаа играчи, го искорнаа семафорот и направија тотален хаос во базенот.
Симпатизерите на Олимпијакос и Панатинаикос досега и' направија толку многу проблеми на грчката полиција што е речиси невозможно да се избројат прекините на мечевите на овие клуба во сите спортови и колкава штета е направена во Атина од нивните дивеења. Најлудиот настан се случи пред, отприлика, две-три години, кога беше уапсен малолетник кој се обиде да внесе домашно изработена рачна бомба на натпревар во женска одбојка меѓу Олимпијакос и Панатинаикос.
Саботниот ватерполо меч исто така не мина без големи инциденти. При резултат 11:6 за Олимпијакос навивачите на Панатинаикос се симнаа од трибините и започнаа физичка пресметка со ватерполистите на ривалскиот клуб. Најпрво со нож го нападнаа Теодорос Хацитеруду, легенда на грчкото ватерполо, а од тешки последици, па можеби и од смрт, го спаси голманот на Пао. Тоталното лудило во базенот продолжи со пресметка со останатите играчи на Олимпијакос.
Верувале или не настрада и семафорот во базенот. Хулиганите го искорнаа со се кабли со намера да го фрлат во базенот. Најлудо од се' е дека натпреварот го обезбедуваа само 15 грчки специјалци. |
