Претходен број

„Комити“ го сардисаа Вардар на Стража, Кометал најави излегување од клубот

Вардаровиот автобус беше демолиран од група навивачи по ремито со Напредок

Сашко Ѓ. Димовски



Автобусот со кој се превезуваа фудбалерите на Вардар на гостувањето во Кичево во неделата демолиран се врати во Скопје. Го демолираа т.н. фанови на „црвено-црните“ кои со два автобуси отпатуваа да го проследат првенствениот меч на вардарци со Напредок. Дуелот заврши без победник (1:1), но на враќање кон главниот град се случи инцидент на планинскиот превој Стража. Навивачите го пречекаа клупскиот автобус, го блокираа, најпрво го демолираа со цигли и камења по што се обидоа и физички да се пресметаат со фудбалерите, изразување на незадоволство што е надвор од секаков здрав човечки разум. Никој од управата на Вардар вчера не беше достапен за коментар, изјава или клупски став по немилиот настан на Стража. Расположен да крене телефон беше единствено техничкиот директор, Дејан Чекаров.

„Во Кичево отпатуваа два автобуса со навивачи на Вардар. Но, не беа пријателски расположени ниту кон управата ниту кон фудбалерите. Уште пред да влезат на стадионот на Напредок скандираа „Ќе ве тепаме, ќе ве тепаме“. Така беше и додека водевме, така беше и по завршување на натпреварот“, ни изјави Чекаров. Чекаров не прецизира кој би можел да стои врз обидот за линч на вардаровите фудбалери на Стража, но сигурен е дека целиот случај има позадина. Повеќе од тоа не сакаше да зборува, коментира. Само ни' порача дека за денеска е закажан состанок на потесното раководство на Вардар во кој ќе се расправа за иднината на спонзорот Кометал во клубот.

Претседателот на „црвено-црните“, Трифун Костовски, беше згрозен од настанот и глетката по враќањето на клупскиот автобус во Скопје и уште во неделата, во изјава за ТВ Телма, најави излегување од структурите во најтрофејниот македонски фудбалски колектив.

„Како семејство едногласно донесовме одлука да излеземе од клубот. Повеќе не гледам причина зошто да бидеме дел од клубот. Постојано се случуваат немили сцени по нашето влегување во Вардар. Речиси на секој натпревар има проблеми. Разочаран сум“, порача претседателот на Вардар, Трифун Костовски.

Ако семејството Костовски остане на својот став за повлекување од Вардар неофицијално дознаваме дека тоа ќе се случи по завршувањето на есенскиот дел од полусезоната во домашното првенство. Дотогаш има уште едно коло во кое Вардар на Градски ќе го пречека лидерот во шампионатот, екипата на Македонија Ѓорче Петров.

Вардар нема победа во последните осум првенствени натпревари и моментно се наоѓа на петтата позиција на табелата со 24 бода, дури 10 помалку од Македонија Ѓ.П. Последната три бода „црвено-црните“ ги прокнижија во осмото коло на домашен терен против Хоризонт Турново со 2:0. Оттогаш забележаа два пораза (од Работнички 2:0 и од Милано со 4:2) и шест реми (на Градски против Металург - 1:1 и во гости против Силекс - 0:0, Победа - 0:0, Пелистер 0:0, Ренова - 1:1, Напредок 1:1). Во меѓувреме вардарци ги завршија и настапите во националниот куп по елиминацијата од Ренова во осминафиналето.