Претходен број

Динчиќ со дрвја и камења по ЕХФ

Часлав Динчиќ го заокружи вербалниот пресинг на водството на репрезентацијата на Србија од самиот почеток на првенството. Обвинувањата од српската делегација дека „организацијата е на најниско ниво“, дека биле сместени во „коњски штали“, алудирајќи веројатно на хотелот „Континентал“ во Скопје, дека во тој поглед биле фаворизирани ЕХФ, Данките и Норвежанките, дека низ салата се шетале „келнери, столари, кој каде сака“ итн., своето финале го имаа со изјавата на српскиот селектор на прес-конференцијата по натпреварот со Македонија.

„Разочаран сум прво поради тоа што, очигледно, на сите големи натпреварувања домаќинот мора да го помине првиот круг. Господата од ЕХФ не ги интересираат ни ракометот ни ракометарките, нив ги интересираат само парите. Не можеа Германија да ја исфрлат, па меѓу Хрватска и Србија не' избраа нас. Пробавме да играме ракомет, но судиите не ни дозволија. Знаев дека намерно ќе делегираат источноевропски судии. Жал ми е за девојките. Македонија играше борбено, но не оди понатаму заслужено подобрата екипа“, беше монологот на Динчиќ.

Прашан за коментар на излагањето на колегата по завршувањето на официјалната средба со новинарите, македонскиот селектор Владимир Глигоров со дипломатски одговор. „Кога и јас би бил на негово место, можеби и јас ќе ја барав вината на друга страна. Спортот е таков - некој ќе загуби, друг ќе се радува“, кратко изјави Глигоров.

Постојаното негодување на Динчиќ, проследено со какви се' не гестикулации, за одлуките на полските судии Барановски и Леманович кулминира при прогласување на најдобрите поединци во двете репрезентации по натпреварот. Андреа Лекиќ не сакаше да го прими подарокот, но селекторот ја убеди да отиде по признанието, притоа покажувајќи им ги на официјалните лица насолзените очи на својот најдобар играч.

На Динчиќ со ЕП во Македонија му заврши договорот со Ракометниот сојуз на Србија. (Р.Д.)