Ако викендов со победите во супервелеслаломот и спустот добивме дефинитивна потврда за враќање на Аксел Лунд Свиндал во врвот на скијањето, тогаш завчерашниот велеслалом најави враќање на уште еден великан, Бенјамин Рајх.
Иако, по првото возење заостануваше повеќе од секунда зад Тед Лигети, Бенјамин Рајх на крајот успеа да слави во вториот велеслалом сезонава во Бивер Крик, Колорадо. Веројатно само тој веруваше дека минусот од 1,08 секунди е достижен за прва победа во Светскиот куп, по онаа во слаломот во Бад Кланкирхајм во 2007 година.
Предноста на Лигети се топеше од метар во метар, за на крајот минусот да биде претворен во позитива од само една стотинка. Американецот така мораше да се задоволи со второто место, а трет беше споменатиот Свиндал, кој изби на чело во генералниот пласман.
