Поглед

Колапс на браковите

Маја Томиќ

Македонците се' повеќе се разведуваат. Последната статистика посебно разочарува, дури за 62 отсто има повеќе разводи во првиот квартал од годинава, споредено со истиот период лани, а за околу 10 отсто помалку склучени бракови. Веќе ниту бракот ниту разводот за луѓето не се некаква светост или табу. Ако во времето на нашите мајки и татковци, баби и дедовци, разводите биле вистинска реткост и се мислело дека ако се разведеш, тоа е нешто многу страшно за семејството, а бракот, каков и да е, треба да се задржи, сега имаме друга ситуација. Се сменија времињата.

Дојде време кога никој не чувствува морална или традиционална обврска да мора да биде во брак со партнерот по секоја цена. Особено се сменија работите кај жените, кои станаа посамостојни и се' полесно се решаваат на развод.

Транзицијата и во овој случај е главниот виновник. Според социолозите, како што растеше безработицата, така растеа и разводите. Луѓето стануваат се' понезадоволни, понервозни и понетрпеливи. А, каде ќе пукне прво ако не во семејствата што се без пари и без егзистенција. Ако таа ситуација трае со години, разводот е логична последица. Рекле стари, среќата со пари не се купува. Ама и без пари век не векува - додаваат новите генерации.

Невработеноста е висока, а се' додека нема работа и финансиска перспектива, луѓето се' полесно ќе носат одлуки да се разведат.

Тоа е една страшна вистина. Каде оди и каде ќе стаса македонската нација доколку продолжат да растат разводите, а да се намалуваат браковите? За каков наталитет ќе зборуваме за десетина години? Какви морални насоки ќе им дадеме на идните генерации, на нашите деца, за вредноста на семејството што треба да го создадат и да го негуваат. Затоа што, на крајот на краиштата, за човекот нема ништо повредно од едно здраво семејство.