Филип Петровски исклучен од партијата на Бошкоски

На досегашниот потпретседател му забележуваат дека работел на своја рака и договарал соработка со Љупчо Георгиевски

Гордана Дувњак

Наместо честитка за својот 38. роденден, потпретседателот на Обединети за Македонија, Филип Петровски, вчера доби подарок - исклучување од партијата. Поранешниот македонски конзул во Њујорк, веста за отстранувањето од партиските редови ја разбра од новинарите.

Од она што можеше да се разбере од штурото партиско соопштение што го лиферуваше партијата на Љубе Бошкоски на редакциските мејлови, главната причина за неговото исклучување е тоа што „дејствувал спротивно од статутот и ги ставил личните интереси пред партиските“. На ваквите квалификации Петровски возврати со контраобвинувања за недостиг од внатрепартиска демократија и за кокетирање со опозициската СДСМ.

„Обединети за Македонија чувствува потреба да ја информира македонската јавност дека Филип Петровски се исклучува од членството на партијата поради дејствување спротивно на Статутот, програмските определби и политичките ставови на партијата“, се вели во партискиот допис испратен од ОМ. Во соопштението се нагласува и дека оваа партија се залага за „непоколебливо практикување на демократијата, се бори за слобода на говорот и различните мислења и се залага за нивна примена“.

„Обединети за Македонија го смета квалитетот на поединецот за единствен критериум при имплементирањето на демократските процеси. За жал, Филип Петровски своите лични интереси и амбиции ги стави над интересите на партијата. Со своето дејствување спротивно на Статутот и на Програмата ги наруши темелните принципи и вредности на партијата“, се вели во дописот, во кој се потсетува дека функцијата потпретседател му престанала на Петровски на првиот конгрес на Обединети за Македонија, кој се одржа во Струмица на 2 мај оваа година. Воедно, се подвлекува дека голем дел од ставовите на Петровски искажани пред конгресот и по него не се согласни со ставовите на партијата Обединети за Македонија.

Прашан околу коментар за неговото исклучување, актуелниот директор на Библиотеката „Браќа Миладиновци“, во телефонскиот разговор ни рече дека е „изненаден и згрозен од начинот на кој се води партијата“. Обвинувањата на своја сметка ги оценува како неточни и паушални, а наедно ја оспорува и легитимноста на неодамна одржаниот конгрес на Обединети за Македонија, како и начинот на кој се избрани делегатите.

Петровски вели дека е разочаран од состојбите во партијата, бидејќи сметал дека таа ќе се развива во сериозна опозициска партија со десничарска ориентација и нема да се претворат во приврзок на СДСМ. Главните точки на судирот со својата досегашна партија ги лоцира на три точки: недостиг од внатрепартиска демократија, кокетирање со опозициската СДСМ, како и сомнителни извори на финансирање.

Според Петровски, партискиот конгрес е одржан на нелегитимен начин и без претходна дебата околу местото на одржување на собирот. За влечење на партиските конци од сенка ја посочува шефицата на кабиенот на претседателот Љубе Бошкоски, Искра Кецковска.

„Наместо да го одржиме конгресот во Охрид за да го демонстрираме констинуиттетот со ВМРО-ДПНЕ, беше избрана Струмица, каде што градоначалник е потпретседателот на СДСМ, Зоран Заев“.

Како што дознаваме од неофицијални извори, довчерашните партиски колеги на Петровски му забележуваат тоа што работел на своја рака и честопати излегувал со лични ставови, пласирајќи ги како став на Обединети за Македонија.

„Филип создаваше раздор во членството и за тоа неколкупати беше предупреден. Без да му даде за тоа некој мандат, самоиницијативно преговараше со Љупчо Георгиевски за обединување на десницата, иако му е добро познат нашиот став дека на избори планираме да одиме сами“, брифираат партиски извори од ОМ. На Петровски му забележуваат дека наводно не верувал ни во позитивниот исход од жалбената постапка во Хаг и оти му нараснале амбициите да стане иден лидер.

Филип Петровски потврдува дека имал контакти со Љупчо Георгиевски и дури се гордее на таа своја иницијатива.

„Сметав дека само со обединување на десницата можеме да му се спротивставиме на Груевски. Но, за оваа моја идеја Љубе Бошкоски беше запознат“, додава тој. Иако не ги открива своите идни планови, сепак, меѓу редови, навестува дека нема намера да се откаже од политиката.

„Во Македонија недостига вистинска демократска партија во која ќе се вреднуваат мислењата на поединците, а партијата нема да биде само во служба на партиски вдомувања“, додава на крајот Филип Петровски.