Мислења

Џулиен Асанж - модерен Робин Худ

Филип Петровски

Не знам што треба да се случи за да се разбудиме, да ги предизвикаме квазиполитичарите кои не' владеат наместо да го подобруваат животот

Активизмот на Џулиен Асанж некои македонски медиуми го нарекоа „Почеток на трета светска војна“, веројатно сакајќи да го потенцираат значењето на тоа што овој човек го направи со објавувањето на тајните дипломатски материјали. И ми се чини дека споредбата е на место. Навистина е премногу значајно тоа што тој го направи. Џулиен Асанж е модерен Робин Худ. Го зема тајното од силните и бесплатно им го дава на послабите. Веројатно многу активисти за човекови права како и слободоумни луѓе сонуваат тие да можат вака да го потресат системот што го толчи на секој можен начин обичниот човек. Да објават материјали за тајноста и неискреноста на својата и на другите влади. Општо е познато дека политичарите и владите не се искрени и работат во длабока дискреција на своите интереси, но многу ретко, да не речам никогаш, не се случува да бидат на ваков начин брутално разголени.

Објавувањето на илјадниците доверливи документи на Интернет предизвика хаос во светските дипломатии, особено оние поголемите. Сега се трага по можните „предавници“, за оние што можеби придонеле за нивното истекување. Некој мора да биде обвинет, зашто беше разголена бруталноста на работата на светските дипломати. На ист начин се направи обид да се дискредитира и уништи Џулиен. Веднаш се појавија обвинувања за сексуални малтретирања од некои Швеѓанки. Интересно е што набрзо се дозна дека едната од нив ми ти била поврзана со ЦИА. Дека ќе се обидат да го дискредитираат и уништат, ми беше и повеќе од јасно. Веројатно и тој самиот си знаел што го чека. Но, се појави еден додатен ефект на кој мислам дека никој не сметал, дури ниту ЦИА, како и другите тајни служби.

Имено, хакерите и слободоумните персони кои се вешти со компјутери спонтано застанаа во одбрана на Асанж. Мислам дека на тој начин тие застанаа во своја одбрана, во одбрана на правото за слободно комуницирање, размена на податоци и право на слобода воопшто. Оти, ако нема спротивставување, владејачките елити се подготвени се' повеќе да земаат. Да ве стават во состојба на дрогирани и индоктринирани кукли кои само ќе имитираат живот. Верувам дека често навистина вака се чувствувате. Како некоја теледиригирана кукла, на која и' е всаден надворешен импулс, наредба како треба да се однесува. Посебно кон владејачките елити. Дека треба да се биде послушен, понизен и добронамерен. Дека не треба да се преиспитува ниедна одлука која е против вашиот интерес затоа што тие што го работат тоа знаат, умеат и се предодредени за тоа. Без разлика што често тие се далеку помалку образувани од вас, што го завршуваат со тешкотија факултетот по десет години студирање и слично.

Затоа хакерите (ова во контекст на сите слободоумни) се спротивставија. И тоа гласно. Ги нападнаа јавно и силно Пејпал и Виза. А најавија напади и на Амазон точка ком. Та затоа Амазон направи лупинг и не ја укина продажбата на документите објавени од Асанж. Вистински потег, оти ако биде нападната нивната страница организирано, може да имаат огромни финансиски загуби. Нападите на хакерите се, всушност, гласот на обичниот човек, кој има свое мислење и држи до својата слобода. Обичниот човек кој често нема никакво влијание врз државните текови и секогаш се смета на него само како на статистика и матичен број.

Претпоставувам дека сега сосема ќе се промени начинот на кој се продуцираат и комуницираат податоците. За да не се случи повторен кејблгате. Системот, светската влада, државните дипломатии ќе бараат начин да се надградат и да не се повтори скандалот. И секако да го супресираат ова што се претвора во ново светско движење за разголување на валк��ниците кои се прават во наше име. Но, ми се чини дека процесот е незапирлив. Тој веќе фати своја насока. Ги обедини сите кои се наоѓаат насекаде и кои контактираат меѓу себе само со компјутер и интернет. Им ја даде силата да сфатат дека можат да го грицкаат системот со сопсвената активност и им покажа дека не се безвредни и обична бројка. Оти беше зафатило едно сивило, една безнадежност дека поединецот нешто може да смени, затоа што ништо не е во негова можност.

Сега ќе видат светските влади со која енергија се судриле. Ќе укинат еден сајт кој го поддржува Асанж, што е бај д веј незаконски и против човековите права, ама затоа веднаш како одговор ќе никнат 10 нови. Тие ќе направат обид да ги укинат. А веднаш како одговор ќе никнат 100 нови. Ќе нема крај на маките на властодршците кои се претставуваат како демократи само кога не се зборува за суштината на демократијата или, пак, за нивниот стил на владеење.

Што од ова има врска со Македонија? Има ли некаков ефект од објавувањето на документите, зашто имаше и документи кои се поврзани со нашата држава. И тоа документи со сериозни импликации. Како за преговорите за името, за хашките случаи кои Бучковски побарал да не се враќаат во државава во време на избори. Веројатно постојат и други документи кои или се' уште не сме ги откриле, оти немаме истражувачи и ентузијасти кои можат уште повеќе да ја соголат домашната политичка арена. Сигурен сум дека нема да отстапиме од моделот на бескпрупулозност во владеењето и дека ако продолжат да се појавуваат ќе покажат оти нашите политичари се исти како оние најлошите кои се разголени во КАЈБЛГЕЈТ. За жал така е. Не гледам дека некој од нив воопшто и се труди да негира или, пак, да коментира за објавеното. Се спомнуваат куферчиња со милионски суми за промена на името. Тоа се настани со далекусежни, повеќегенерациски последици и пак ништо. Некако кај нас за се следи едно големо НИШТО. Ниедна државна институција која би требало да реагира по службена должност, барем да провери за што станува збор, не кажува ни „а“ ни „б“.

Забога, па не знам што треба да се случи во светот или кај нас за да се разбудиме. За да ги предизвикаме квазиполитичарите кои не владеат, наместо да го подобруваат животот. Никако да излеземе од дупката. По никоја цена. А целата околина веќе има свои верзии на Викиликс. Почнуваат да се појавуваат материјали за копумпираноста на политичарите во Бугарија, за штетни договори, за провизии. Не знам, можеби ефектот кај нас ќе биде да се разбуди барем еден човек. Штипнете се, да видите дали барем вие сте будни.

(Авторот е доктор по политички науки)

http://www.filippetrovski.com