Тереза Кесовија

Прекршена заклетва - концерт во Србија по 20 години

Хрватската и некогаш голема југословенска ѕвезда Тереза Кесовија ја прекрши својата јавна заклетва дека никогаш нема да настапува во Србија поради гранатирањето на нејзината куќа во Конавле кај Дубровник од силите на ЈНА во времето на раздружувањето на Хрватска од Југославија. Тереза ќе одржи концерти во Нови Сад и во Белград на 22 и 23 јануари идната година.

„Не сакав и не можев веќе да се казнувам ни себеси ни својата публика и затоа решив по 20 години повторно да дојдам во Нови Сад и во Белград. Политичарите едно време ги направија невозможни нашите средби, но сега сум сигурна дека можеме да ја градиме иднината со почит и љубов“, изјавила Тереза за српскиот печат.

Своите „тврди“ заклетви пред хрватската јавност во изминатите години Тереза во Србија ги објаснува со зборовите: „Никогаш не сум им правела зло на луѓето и едно утро се најдов пред урнатина каде што некогаш се наоѓаше мојот дом. Во афект, човек сешто може да каже, зашто не разбрав со што заслужив некој да се изживува над мојата куќа. Лично ја доживеав загубата на домот, како и многу унесреќени луѓе во таа војна, на сите страни. Но, мора да одиме понатаму“.

Овој потег на Тереза многу контроверзно е прифатен и во Хрватска и во Србија. Во нејзината татковина цинично констатираат дека нејзините принципи и заклетви паднале пред искушението на еврата, додека во Србија Бора Чорба повикува да се бојкотираат нејзините концерти.