Министрите како холивудски ѕвезди

Јани Макрадули, потпретседател на парламентот, нуди пет причини за вонредни избори

Соња Крамарска


„Има многу причини зошто треба да се одржат предвремени избори, но сите може да се опишат со еден збор - поради нашата иднина“, вели потпретседателот на парламентот од редовите на опозициските социјалдемократи Јани Макрадули.

Во првите пет причини за одржување предвремени избори што станаа политичка платформа на СДСМ, Макрадули прв ја посочува сиромаштијата и невработеноста кои се присутни и по четири и полгодишното владеење на ривалската десница.

„Економијата е најсилен пример за поразот на политиките на Груевски“, вели Макрадули. Денес во Македонија секој трет е сиромашен, а Владата, цинично констатира тој, љубоморно го чува првото место во светот по невработеност.

„Партиските вработени примаат плата за седење дома, бизнисмените половина работно време работат за плаќање глоби, странските инвеститори повеќе време се на суд со Владата отколку во фабриките“, наведува вториот парламентарец. „Платите не се одмрзнуваат, придонесите наместо да се намалуваат тие се зголемуваат, рамниот данок доживеа сеизмички поместувања, Фондот за здравство отиде во стечај“, додава.

Втората причина за предвремени избори е фактот, вели Макрадули, што Груевски и ВМРО-ДПМНЕ ја торпедираа слободата на изразувањето. „Дебатите ги анатемисаа, експертите ги омаловажија, а невладините организации ги етикетираа. Демонстрираа сила и со полициски сили се обидоа да попречат движење и говор на новинари. Владеењето на ВМРО-ДПМНЕ ќе се памети по тепање камермани, тужби кон новинари, упад во Здружението на новинарите и промовирање на ’бурек-бумбар’ новинарство“, аргументира Јани Макрадули.

Третата причина, смета тој, е дебаклот во надворешната политика. „Македонија го живее најизолираниот период од осамостојувањето“, тврди потпретседателот на парламентот. Странските државници, вели, не' заобиколуваат, премиерот никаде не го канат. Пратениците на ВМРО-ДПМНЕ се како во реално шоу со наслов „навреди ја ЕУ“. Но, Макрадули цинично додава: „Ах, гледам дека премиерот се сретна со Роберт Мугабе и разговарале за соработка, веројатно за диктаторски тактики“.

„Им пречи потеклото на европратениците, нивната партиска припадност и отвореност. Немоќта во исполнувањето на критериумите ја дефокусираат со навреди кон странските дипломати, вистински пријатели на Македонија. Денес, наместо нашата администрација да оди во Брисел, ЕУ ни праќа инспектори да провери каква влада имаме“, оцени Макрадули.

Проектот „Скопје 2014“ е четврта причина за барање предвремени избори од страна на СДСМ. Макрадули вели дека 2010 година ќе заврши со потрошени 350 милиони евра - пари на граѓаните - за проектот „Скопје 2014“.

„Ги потрошија нашите пари, ја изгубија документацијата. Од парите на граѓаните наместо патот Велес - Свети Николе, градат жичарница во Скопје, а наместо пари за патот Гостивар – Дебар, купуваат двокатни автобуси за Скопје. Парите од граѓаните не ги вложуваат во енергетски објекти, туку во триумфалната порта, секако, пак во Скопје“, е аргументацијата на Макрадули.

Петто, вели тој, се состојби во другите поважни сфери. Здравството, на пример, кое е тврди, немоќно за болните, и претставува опасност за здравите. Образованието, пак, не' учи на изместена географија, ревидирана историја, математика без бројки, споменици со непознати букви.

„Денес, наместо на работа, министрите се сликаат замислувајќи се како холивудски ѕвезди, а наместо одговори, ни солат памет“, вели Макрадули. „Со портокаловата преродба ги насочија луѓето кон контејнерите, ги намалија работниците во индустријата. Магистри и доктори на науки губат на конкурси за вработување од бодигардите на премиерот. Трошат пари за кампањи за толеранција, а ги дискриминираат политичките неистомисленици. Во Македонија слободата е сведена на страв за зборување и пишување“, наведува Јани Макрадули.