Интервју

Брендот е препознатливост што се гради и надградува со години

Љупка Наумовска

„Би милк“, според сите истражувања и пазарната позиција, успеа да изгради и да одржи одличен бренд-имиџ, вели маркетинг-менаџерка на Битолска млекарница

Александрија Стевковска

Колку македонските производи имаат изграден бренд-идентитет. Кои се активностите на тоа поле?

Брендот е лична карта преку која организацијата ги комуницира своите вредности и ги доставува своите ветувања. Истовремено брендот претставува капитална вредност и емотивна страна на компанијата. Притоа, треба јасно да се направи дистинкција меѓу бренд-идентитет и бренд-имиџ. Кога се зборува за бренд-идентитет се мисли на перцепцијата што организацијата ја има за себе и за начините на кои се претставува. Бренд-имиџот е перцепцијата на купувачите, на конкурентите за организацијата. Тргнувајќи од ова, станува јасно дека сите компании имаат бренд-идентитет што е стратегиски или ад хок изграден, но вистинското прашање е каков е бренд- имиџот, односно каква е перцепцијата на пазарот, постојните, потенцијалните купувачи, конкуренцијата. Битолска млекарница, според сите истражувања и моментната пазарна позиција успеа да изгради и да одржи одличен бренд-имиџ. Корпоративниот бренд и дел од производните брендови уживаат највисока свесност кај купувачите. Тоа се постигнува со долгорочен, систематски и синергиски пристап кон сите инволвирани страни: кооперанти, купувачи, дистрибутери, медиуми и регулатори. Комуникациската и бренд-стратегијата еднакво ги третира сите. Брендот ветува, а комуникациската стратегија ги исполнува тие ветувања: врвен квалитет, одличен дизајн, достапност и интеракција со купувачот.

Кои се трендовите во млечната индустрија во ЕУ, посебно во регионот на Југоисточна Европа. Какви производи доминираат?

Зголемената свесност на потрошувачите за здрав и квалитетен живот ја зголемува побарувачката за категоријата функционални млечни производи што во својот состав содржат додадена вредност.

Функционалноста е најчесто поврзана со концептот за здравје, па оттука иновациите на млекарниците во ЕУ, во регионот и во Битолска млекарница го следат овој тренд. Воведени се јогурти и млечни напитоци што го подобруваат имунитетот, млеко збогатено со витамини, јогурт и кисело млеко што го олеснуваат и го подобруваат варењето, како што е „баланс +“. Истовремено, се зголемува побарувачката на сирења од овчо млеко, посебно во регионите на Западна Европа.

Дали Битолска млекарница размислува за воведување нови производи?

Да. Развојот на нови производи окупира се' позначаен дел од активностите на тимовите за производство и маркетинг. Пред две недели е воведен нов производ „баланс + сет“ (кисело млеко), кој ја содржи истата култура на јогуртот „баланс +“ што го подобрува варењето на храната и е во форма на кисело млеко. Вкусот е одличен, а производот е уникатен по функционалноста, а дизајнот, кој е препозн��тлив за продукт-брендот „баланс +“, видливо го диференцира на продажното место. Оваа година го воведовме и веќе препознатливото „пекорино“, совршен спој на италијански рецепт, македонско млеко и традиција. „Пекорино“ ќе се извезува во регионот и ќе се продава во ограничени количини на македонскиот пазар. Во 2011 година се планирани иновации и нови производи кај соковите, јогуртите и млекото.

Неодамна присуствувавте на големиот агросаем во Ростов, Русија. Какви се можностите за извоз таму?

Мерено по волумен, Русија има огромна апсорпциона моќ за која било голема компанија од овој регион. Постоја�� делумни бариери за извоз, но добро е што активно работиме на нивно надминување. Лобирањето се одвива на меѓукомпаниска основа, како и преку трговските комори.

Во овој период постои недостиг од млеко. Што треба да се направи за во иднина да се амортизираат негативните импликации?

Недостиг од млеко постои континуирано во регионот, а во одредени периоди и во ЕУ. Тоа е случај и со Македонија каде што 20-30 отсто од потребите се задоволуваат со увозно млеко. Тоа, секако, може да се промени со зголемување на рентабилноста на фармите, подобрување на млечноста по крава, како и со окрупнување на фармите. Во тој процес е потребен синергиски пристап и е неопходна поддршка и од државата, особено со цел да се зајакне идната позицијата на млекопроизводители.

Групацијата „Данубе фудс“ е особено моќен и стабилен систем, во кои и млекарницата има дел. Што можеме да очекуваме во иднина и кои се предностите да се биде дел од голем систем?

Регионот на Балканот е претесен, нема простор за голем број компании. Фактот дека Битолска млекарница е дел од ДФГ подразбира стабилност и можност за развој, размена на знаење, искуство и, пред се', можност за пристап кон странски пазари што Битолска млекарница го користи во добри размери. Македонија е богата со природно чиста вода, еколошки реони и со традиција на производство на млеко и млечни производи, а со веќе воспоставената мрежа на ДФГ гледам шанса за поголем извоз на странските пазари што ќе се реализира преку ресурсите на групацијата ДФГ.