Отворете очи, врие од отровни играчки!

Кинеските играчки содржат токсични материи штетни за здравјето на децата

Жаклина Ѓорѓевиќ


Тешки метали, олово и хром содржат кинеските играчки што се продаваат на пазарот, обелодени вчера Центарот за истражување и информирање на животната средина „Екосвест“, презентирајќи ги резултатите од истражувањето за присуството на опасни хемикалии во земјава. Токсични материи се пронајдени и кај 92 процента од 40-ина козметички производи што се проверени, како и кај 33 отсто од 20 проверени средства за хигиена во домаќинствата. Истражувањето е реализирано од почетокот на годинава според стандардите на ЕУ.

„Избегнувајте играчки или предмети што интензивно мирисаат. Играчките што се пластични или дрвени и се со интензивни бои, многу веројатно дека се токсични. Кај играчките пронајдовме фталати, кои се пластификати, односно се додаваат на пластиката за да биде поиздржлива, а кај децата емитуваат женски хормони“, предупреди Ана Чоловиќ-Лешоска, директорка на „Екосвест“. Таа вели дека кај некои домашни средства за хигиена не е означено што содржат, иако стои дека треба да се внимава ако се употребуваат. На производите, според неа, нема ниту ознаки дека се токсични. Затоа таа апелира до граѓаните да се користат традиционални производи или производи со проверен квалитет.

Меури од сапуница, пластични диносауруси, топки, гитари на дување, фломастери, топчиња за рекети, животински фигури, кадифени коцки, јо-јо играчки, кукли, базени и чамци за деца на дување, дрвени сложувалки, сетови за шминкање чија земја на потекло најчесто е Кина, се дел од лепезата производи за кои во истражувањето е посочено дека содржат токсични материи.

Освен кај играчките што во најголем дел се од Кина, токсични материи се најдени кај козметичките производи, кај кои е регистрирано присуство на формалин. Штетните хемикалии пронајдени кај козметичките производи може да предизвика иритација на кожата и на очите и разни алергии.

Драгана Угриновска, координаторка на проектот „Опасни хемикалии во Македонија“, појаснува дека целта на истражувањето е да се информира јавноста за можните штетни влијанија врз животната средина и здравјето на луѓето. „На голем број производи не е наведен процентот на хемикалијата што се смета за штетна“, изјави Угриновска.

Двете претставнички на „Екосвест“ најавија дека резултатите од истражувањето ќе ги испратат до надлежните инспекциски служби. Во наредниот период тие најавија дека ќе спроведат и истражување за присуството на жива во организмот.