Поглед

Мандат на кредит

Сања Наумовска

Градоначалникот на Скопје, Коце Трајановски, си посака втор мандат. Не за друго, туку за да ги врати кредитите со кои ќе ги гради катните гаражи. Таман кога го нападнаа дека се задолжувал со грејс-период од две години за да го намести својот наследник да ги плаќа ратите, Трајановски си смисли соломонско решение, ќе си остане во фотелјата. Око не му трепна и пред целата јавност сам си рече дека сака уште еден мандат. Ќе се жртвува да не оштети некој друг, па тој самиот ќе си брцнува во буџетот и со парите на скопјани ќе ги отплатува гаражите. Сигурно е дека ќе му биде мачно да пл��ќа, а граѓаните да му фаќаат сеир.

Градот Скопје ќе зајми осум милиони евра од банка за да направи две катни гаражи во центарот на градот. Дел од парите ќе ги врати со продажба на деловниот простор, но најголем дел ќе треба да се платат од буџетот. Отплатата треба да почне токму на крајот од мандатот на Трајановски. Тој ќе ги изгради објектите и ќе си ги впише како заслуга, а следниот што ќе седне во неговата фотелја ќе ги плаќа сметките.

Освен ако не се оствари замислата на градскиот татко. Да си заседне уште четири години. Можеби на следните избори ќе не' изненади со уште поголема програма од претходната „Заедно за Скопје“. Во првата има стотици различни планирани проекти, со кои им ги освои срцата и гласовите на скопјани. Иако идејата за изградба на катни гаражи не доаѓа изворно од програмата, туку од повисоко ниво, сепак, заслугата ќе биде на градската власт. И обврската да плаќаат долгови, се разбира. Затоа во новата програма Трајановски можеби ќе ги вметне и веќе направените објекти за кои се задолжил со кредити. Со нив сигурно ќе им ги освои џебовите на граѓаните.