Осудените на доживотна бараат „хашка милост“
Најави за бунт во најголемиот затвор во земјава
Горан Адамовски
Намалување на доживотните казни затвор и целосна амнестија за другите осуденици, бараат затворениците во „Идризово“. Инспирирани од неодамнешната амнестија на обвинетите во четирите хашки случаи, станарите на најголемиот затвор во земјата упатиле ултиматум до властите барањата да им бидат исполнети во рок од две недели. Во затворот „Идризово“, како и во Управата за извршување санкции, вчера немаше кој да ги потврди или да ги демантира овие информации. Надлежните беа свикани на итен состанок, кој траеше до доцна попладнето.
Според информациите на „Утрински весник“, барањата на затворениците воопшто не се наивни ниту, пак, станува збор за обично поднесено барање.
„Казните на триесетината затвореници што се осудени на доживотен затвор да им бидат намалени на 20 години. Другите затвореници да бидат амнестирани. Помилувањата да бидат изречени до Илинден, односно на 2 август. Ако не, се закануваат дека веќе на 3 август ќе се организира силен бунт“, велат нашите извори.
Се тврди дека затворениците вчера биле на средба со директорот на затворот, Миле Младеновски. Најавените барања на затворениците следуваат откако парламентарното мнозинство донесе политичка одлука за повлекување на хашките случаи, односно одлука со која судот веќе нема да суди по поднесените обвиненија за најтешки кривични дела.
Во „Идризово“ се паметат неколку протести на затворениците, тепачки, инциденти, но ситуацијата набргу била доведувана во ред. Сега може да биде поинаку, стравуваат вработените во затворот. |
