„Крушево-етноград“
Нови денови за востание во костими
Од недела, 24 јули, одново почнува летното туристичко востание (трет пат) во Крушево, со свечено отворање пред споменикот „Илинден“
„А„Ако го вратиме Крушево сто години во минатото, големи се шансите да го фатиме чекорот на иднината“, кажа пред четири години тогашната градоначалничката на Крушево, Лефка Гаџовска, промовирајќи го проектот „Крушево - етноград“. Дури и кога ќе се слушне вакво нешто по одредена временска дистанца и понатаму звучи како шеговит афоризам. Но, и покрај навидум шегобијниот пристап, „Крушево - етноград“ веќе трета година е манифестација што се случува и го извлекува градот на востанието од асоцијацијата на „Твин пикс“, која е запишана како несмасен графит на таблата од влезот во Крушево.
На шега - на смеа, но од утре, 24 јули, одново почнува летното туристичко востание, со свечено отворање пред споменикот Илинден. Идеологот на ова туристичко востание, неформален војвода и ентузијастички пијар (пропагандист) на манифестацијата, Ранко Петровиќ, ненаметливо, но упорно ја спроведува идејата дваесетина дена во Крушево, граѓаните, туристите, политичарите, културно-естрадните ѕвезди да ги костимира и да ги стави во времепловот на Илинденското востание. Со идејна и материјална поддршка од Општината Крушево и Историскиот музеј, градот дваесетина дена (со тенденција да трае и подолго), враќајќи се сто години наназад, настојува да ј�� дофати надежта за посреќна и поудобна иднина. Годинава се очекуваат 3.000-4.000 туристи во тие денови на туристичко востание, а за нивна анимација се организираат разни тематски вечери (турска, чорбаџиска, вечер на серенади...) и некои други активности , што ќе ја зацврстат позицијата и идејата за „Крушево - етноград“.
Кога во недела, во 19 ч., Ранко Петровиќ Бубамара ќе се обрати со новиот туристички манифест, веројатно, во стилот: „Браќа, сестри и мили комшии,
денеска од слободно Крушево, пред споменикот Илинден, продолжува идејата за КРУШЕВО ЕТНОГРАД, започнува новото, овој пат туристичко востание. БРАЌА, Брзаме да Ви го честитаме востанието!... Ве поздравувам, сите вас храбри јунаци што денеска сте тука и ја поддржавте идејата за КРУШЕВО ЕТНОГРАД. Воедно ги охрабрувам сите, и сеирџиите и кодошите и дезертерите да се приклучат кон нашето туристичко востание напорно да работат, бидејќи без нив нашата победа нема да биде толку голема и слатка. Како крушевски локум...“, значи дека поканата е отворена, за сите оние што сакаат да го почувствуваат историскиот времеплов со забавен карактер.
Побрзајте да си го честитате востанието!
(Ј.П.)
|
