Нема веќе аџилак на гробот на Рудолф Хес
Коските на заменикот на Адолф Хитлер се ексхумирани и ќе бидат спалени
Гробот во кој се наоѓаат останките на Рудолф Хес, заменикот на Адолф Хитлер, е уништен за да престане да се користи како место за аџилак на неонацистите. Коските на Хес во средата изутрината биле ексхумирани од гробиштата во градот Вунсидел, во јужниот дел на Германија. Останките ќе бидат кремирани и потоа истурени во морето.
Хес беше заробен откако замина за Британија во 1941 година и беше осуден на доживотен затвор. Тој се самоуби во затворот во Берлин во 1987 година на 93-годишна возраст. Како што побарал во својот тестамент, тој бил погребан во малиот баварски град Вунсидел, каде што неговото семејство има викенд-куќа и каде што неговите родители веќе биле погребани.
Локалната лутеранска црква, под чија надлежност се гробиштата, во тоа време ја даде дозволата за погребување, наведувајќи дека желбите на починатиот не може да бидат игнорирани, објави „Зидојче цајтунг“. Но, тие и локалното население оттогаш станаа се' позагрижени од бројот на екстремно десничарските групи што го посетуваат гробот.
Секоја година на годишнината од неговата смрт неонацистите се обидуваат да организираат марш до гробиштата, салутирајќи пред гробот со неговиот епитаф „Јас се осмелив“ и положуваат венци цвеќе. Судската одлука од 2005 година со која се забранија такви собири имаше мал ефект, па црквата се одлучи да го поништи закупот на гробното место на семејството од октомври 2011 година.
Внуката на Хес се спротивстави на одлуката, објави весникот. Таа поведе судска постапка во обид да се спречи ова, но на крај беше наговорена од советот на општината да се откаже од случајот и да дозволи да се изведе ексхумацијата.
Хес беше еден од најблиските соработници на Хитлер. Но, во 1941 година тој направи соло-посета на Шкотска каде што неговиот авион се урна, а таму беше во, наводно, неовластена мировна мисија што беше осудено од страна на фирерот. Тој беше затворен од страна на Британците во текот на целото траење на војната. На судењата во Нирнберг во 1946 година Хес беше ослободен од обвиненијата за воени злосторства и злосторства против човештвото, но беше осуден за злосторства против мирот и му беше изречена казна доживотен затвор. Тој помина 40 години во затворот „Шпандау“ во Берлин. Беше последниот затвореник во затворот кога во август 1987 година беше пронајден обесен. (Би-Би-Си) |
