Нема докази за поткуп на политичари, партиите молчат

Јавното обвинителство водело постапка, но не нашло докази дека „Дојче телеком“ и „Маѓар телеком“ поткупувале политичари

Сања Наумовска


Скопското јавно обвинителство го истражувало случајот за поткуп на македонски политичари и политичка партија од страна на „Дојче телеком“ и „Маѓар телеком“ во 2005 и 2006 година. Докази за поткупот не биле најдени, па не била поведена ниту постапка против ниту еден носител на функција од тоа време. Сепак, според скопскиот јавен обвинител Марко Зврлевски, за истите настани од посочениот временски период обвинителството веќе има кривични пријави против одговорни лица во „Маѓар телеком“. „На посочениот настан обвинителството работело и доколку имало докази за поткуп, ќе имало и постапка“, одговори Зврлевски.

Со оглед на тоа дека со спогодбата за плаќање на казната од 95 милиони долари, се затвори и судската постапка во САД, веројатно е дека без одговор ќе останат прашањата - кои се имињата на политичарите кои според Американската комисија за хартии од вредност добиле 4,88 милиони евра за непостојни консултантски услуги, со цел да спречат, односно да го одолжат појавувањето на вториот телекомуникациски оператотор во земјава.

Според пишувањето на „Утрински весник“ во септември 2010 година, државниот јавен обвинител Љупчо Шврговски тогаш најавил истрага за тоа дали македонски политичари биле дел од скандалот со примање провизија, а од сознанијата кои ќе бидат добиени би зависело дали истрагата против четворицата одговорни лица од „Маѓар телеком“ ќе биде проширена и на други лица. Директорите на унгарската компанија биле осомничени дека во периодот од 2000 до 2006 година направиле проневера од 24 милиони евра. Дел од нив се и настаните со поткупот на домашни политичари и политичка партија за да се спречи конкуренцијата на телекомуникацискиот пазар.

За настаните од 2005 и 2006 година, кои се актуелизираа со одлуката донесена во САД за казнување на телекомуникациските оператори, деновиве молчат и двете најголеми политички партии во земјава, СДСМ, кој во посочениот период беше на власт, но и ВМРО-ДПМНЕ. Изостанува препознатливото препукување преку партиските портпароли, кои го игнорираат случајот, иако сме биле сведоци дека теми за нивни прес- конференции биле и многу поневажни настани кои се случувале или се случуваат во времето на владеењето на едната или другата партија.

Владо Бучковски, кој беше премиер во времето на случувањето на аферата, неодамна за „Утрински“ изјави дека не знае дали наши политичари биле инволвирани во земање мито од телекомуникациските фирми. „Зад целиот процес, всушност, стои игра на големи компании кои се борат да ја искористат секоја грешка на конкуренцијата. Ова е еден случај во кој Американците ги ловат пропустите на ’Дојче телеком‘ за да спречат нивен влез на американскиот пазар“, рече Бучковски.

Коментар за аферата со провизијата за македонските политичари немаа ниту во нашиот Телеком. Од таму не' преупатија на одговорот на двете инволвирани компании.

„’Маѓар телеком‘ и ’Дојче Телеком‘ постигнаа спогодба со Министерството за правда на САД и Комисијата за хартии од вредност за разрешување на нивните претходно објавени истраги што произлегуваат од случувањата од 2005 и 2006 година утврдени во Македонија и во Црна Гора. Не се смета дека ’Дојче телеком‘ ги прекршил антикорупциските одредби од Законот за спречување на корумпирано однесување во странство. Министерството за правда, во спогодбата за неповедување обвинение против ДТ од страна на Министерството за правда, се согласи да не поднесе кривична тужба против ДТ, вклучувајќи и за какво било прекршување на барањата за водење на сметководствените книги и евиденција според Законот за хартии од вредност на САД. За возврат, меѓу другото, ДТ се согласи на властите на САД да им плати парична казна во износ од 4,36 милиони долари“, се вели во соопштението од „Дојче телеком“.

Од казната, во висина од 95 милиони долари, „Маѓар телеком“ ќе треба да врати остварена добивка во износ од 31,2 милиони долари и кривична казна во износ од 59,6 милиони долари, сума договорена со Министерството за правда на САД поради „одложено“ гонење, со што кривичната тужба се заменува со парична казна.