Јелена Карлеуша

Родена сум со дефект

Јелена Карлеуша, една од најпопуларните и најконтроверзни српски пејачки, ја отвори душата пред македонските новинари на вчерашната прес-конференција во Скопје што се одржа по повод нејзиниот концерт „All about Diva“, закажан за 20 ноември во салата „Борис Трајковски“.

„Во Скопје ќе ги дадам и душата и срцето, да се исплати и последниот денар даден за влезница. Сто отсто сум сигурна дека ќе ја воодушевам македонската публика“, порача самоуверено Карлеуша, која на пресот се појави во бело мини-фустанче и големи очила. Расположена за разговор, призна дека е родена со дефект - вистината да излегува неконтролирано од неа. „Луѓето на естрадата малку се плашат. За разлика од нив, јас секогаш го кажувам тоа што го мислам. Најшокантно е што ја зборувам вистината“.

Карлеуша проговори и за вечната ривалка - Цеца. Рече дека е невозможно да сними дует со неа и дека двете се наполно спротивни. „Ние сме црно и бело, јас секако сум белата“. За сопругот, фудбалерот на „Црвена ѕвезда“, Душко Тошиќ, објасни дека е седум години помлад од неа и дека е предност да се има млад маж. „Навреме ја фатив таа глина и ја обликував. Да имаше 30 години, ќе биде предоцна“. Јелена призна дека македонските пејачи се многу подобри од српските, но и дека се малку подзаспани... Контроверзната пејачка се смири на прашање врзано за Тоше Проески со кого призна дека биле многу блиски, а се запознале во Грција. „Се' уште не сум била на неговото вечно почивалиште. Ќе бидам искрена - не сакам гробишта и не сакам да одам таму. Јас луѓето ги држам во срцето“.

Скопскиот концерт на Карлеуша е во организација на „Јованов рекордс“ и „Топ-мјузик продукција“. (К.Ш.)