Фронт против Европа

Зошто власта по секоја цена сака да се скара со Брисел?

Слободанка Јовановска

Листата на непријатели на Македонија почна опасно да се проширува, па по извештајот на ЕУ, на неа се најдоа не само евроамбасадорот Ерван Фуере, туку и Европската комисија. Деновиве писмо до ВМРО-ДПМНЕ испратил и известувачот Зоран Талер, барајќи да престанат да му отвораат фронт, поточно да праќаат СМС-пораки во Словенија со кои го клеветат дека застанал зад грчките интереси во спорот.

На „Фејсбук“, кој стана главен медиум за клеветење, портпаролот на Владата, Мартин Мартиновски, вчера ширеше навреди и потсмев за амбасадорот на ЕУ и покрај предупредувањето од претседателот на Унијата, Херман Ван Ромпуј, дадено во Скопје да престанат да го малтретираат Фуере и сличната реакција од Комисијата.
Прашањето што се наметнува е зошто власта по секоја цена сака да се скара со Брисел еден месец пред одлуката на Европскиот совет за препораката, па ги одвраќа од Македонија токму оние кои останаа последни што се обидуваат да помогнат и амбасадорот Фуере, кој и онака веќе е на списокот за заминување од земјата.

Според извори од Брисел, и европратеникот Едуард Кукан при последната средба со делегација од Македонија барал властите да престанат со притисоците врз парламентарците и функционерите на ЕУ, бидејќи тоа однесување е катастрофално за интересите на Македонија.

Освен Бернард Поселт и Чарлс Танок, кои имаат блиски односи и интереси со ВМРО-ДПМНЕ, сите други кои се препознаваа како промакедонски настроени парламентарци кренале или се на пат да кренат раце, исфрустрирани од притисоците што ги трпат од Македонија.

Зошто, и покрај сето ова, ЕК ни даде препорака за преговори? Според оцени во Брисел, ЕК знае дека, дала препорака или не, спорот нема да биде решен годинава, а вака не се става во ситуација да објаснува зошто повлекува оценка што еднаш веќе ја напишала во документ. Некои оцени одат и подалеку, во смисла дека интересите на оваа Влада и на неколку земји-членки кои не сакаат проширување се поклопуваат, бидејќи и на едните и на другите им одговара одолжувањето на процесот.

Тие ги отфрлаат како фраза најавите од еврокомесарот Штефан Филе дека, ако треба, тој и претседателот на ЕК, Жозе Мануел Баросо, ќе се вклучат и ќе помогнат околу преговорите за името. Според овие извори, Филе тврдел дека преговарачкиот процес во ОН е доволен и дека најдобро може да се реши со билатерални контакти, став што ги збунува сите, бидејќи освен во македонскиот, нема спор на Балканот во кој на некој начин не е вмешана ЕУ во моментов. Така е во спорот внатре во БиХ околу спорот за статусот на Косово и во тој меѓу Словенија и Хрватска. Изјавата на Филе дека, сепак, би помогнал се сфаќа како обид да се даде некаква фиктивна надеж на тие што притискаат Брисел да се вклучи во оваа драма со Македонија. Пречка да се вклучи ЕУ во спорот, според овие оцени, е и премиерот Груевски, кој сметал дека исходот од тоа би бил премногу неизвесен, односно не и' гарантира победа на Македонија.

Случајно или не, известувачот Зоран Талер вчера испрати писмо до медиумите во кое вели дека „е дојдено времето да се размисли за некаква арбитража за да се реши спорот за името“. Според него, во сечиј интерес е Македонија „да стане економски просперитетна земја, која целосно ќе ги почитува слободата, човековите права, демократијата и владеењето на правото“.

Притоа, тој му се обраќа и на Александар Спасеновски од ВМРО-ДПМНЕ, кој само неколку дена претходно му изразил „длабока благодарност за неговите напори за евроинтеграцијата на Македонија“. Пред само два дена, сите од власта тврдеа дека извештајот е објективен, а кога се соочија со забелешките, продолжија да „пукаат“ по Фуере и по ЕК за неименување на јазикот, практика што им беше позната на сите од пред четири години. Минатата година тоа беше и официјализирано во упатството на ЕУ за користење имиња на држави и придавки и, иако го објави тоа „Утрински весник“, никој од власта не излезе да реагира, а не, пак, нешто да смени. (С.Ј.)