Розовите заминаа - Алфа си останува Алфа

„Пинк не можеше да ја прифати понудата и да ги исполни условите што се бараа“, изјави првиот човек на телевизијата, Младен Дамев

Светлана Унковска


Само еден ден пред да стартува најавениот нов програмски концепт на ТВ Алфа и нејзиното преземање од српската ТВ Пинк, двајцата сопственици Штерјо Наков и Жељко Митровиќ го растурија договорот за купопродажба на оваа скопска телевизија. Кога се' беше извесно дека од денеска треба да почне емитување на новата програмска шема и дека Митровиќ ќе биде стопроцентен сопственик на телевизијата на Наков, завчера доцна вечерта во јавноста проструија информациите дека од договорот нема ништо, бидејќи двајцата сопственици не се договориле околу парите.

Неофицијално дознаваме дека програмското раководство на ТВ Алфа завчеравечер било свикано на состанок со директорите и веднаш по завршувањето на средбата околу 20 часот, низ телевизијата се пренела информацијата дека Наков и Митровиќ го поништиле меѓусебниот договор.

Вработените го прифатиле ваквиот епилог со голема радост и одушевување и, како што коментираат некои од нив, им паднал камен од срце, бидејќи Алфа си останува Алфа. Информациите меѓу нив биле дека од Пинк планирале целата програма да тече од Србија, а тука само да се титлува, поради што многу од нив се плашеле дека ќе останат без работа.

Сопственикот Наков вчера не коментираше за причините зошто не се реализира договорот. Тој само не' упати за „се' што сакаме да дознаеме, да го прашаме генералниот директор на Алфа, Младен Дамев“.

„Договор меѓу Алфа и Пинк не беше постигнат. Она што можам да кажам е дека се работеше на преговори. Очигледно Пинк не можеше да ја прифати понудата и да ги исполни условите што се бараа и секој си продолжува со својот пат“, ни изјави првиот човек на телевизијата, Дамев. Тој ги отфрли како неосновани шпекулациите што се пренесоа во јавноста дека причина за растурање на договорот се влијанија на одредени опозициони партии. А шпекулациите беа дека, наводно, „високи партиски личности на СДСМ, преку одредени притисоци, го убедиле Наков да се откаже од продажбата на телевизијата“. Вчера и од оваа партија ги отфрлија ваквите информации како неосновани.

„Самиот факт што прв пат од вас ја слушаме оваа информација покажува дека не сме имале никаква врска ниту со претходната одлука за продавање ниту, пак, со оваа одлука. Посебно поради тоа што се работи за бизнис-релации и одлуки на приватни компании“, велат од СДСМ. Ваквите шпекулации ги отфрли и директорот на Алфа. „Не станува збор дека која било политичка партија вршела притисок врз нас да не ја продаваме телевизијата. Тука се во прашање бизнис-интереси, и единствено за што не се договоривме се парите. Митровиќ не беше подготвен да ги исполни обврските, а со тоа и понудата што му беше дадена“, вели Дамев.

Сепак, газдата на Пинк, кој се' уште е во земјава, не се откажува од планот да купи телевизија во земјава. Вчера тој бил и во Советот за радиодифузија, каде што со претседателот Зоран Стефановски разговарал дека има сериозни намери да купи телевизија во Македонија.

„Разговараме со Митровиќ за можноста за инвестирање во некоја од овдешните телевизии, бидејќи неговите намери се многу сериозни. Тој не' информира за тоа што се случило со Алфа, но моментно е во преговори со други телевизии“, ни изјави Стефановски, кој не сакаше да открие за која телевизија станува збор. Сепак, дознаваме дека Пинк има намера да ги продолжи преговорите за купување на телевизијата К-15. И самиот Митровиќ во интервју за српски медиум пред повеќе од еден месец откри дека сака да ја купи К-15. Преговорите биле одложени поради тоа што во меѓувреме се отворила можноста за купување на Алфа како пореномирана телевизија, за што ��итровиќ покажал големо интересирање и затоа ги замрзнал разговорите со К-15.