Инспектор тепал притвореник со клоци

Битолчанец ќе бара одговорност за полицаецот што се однесувал брутално кон неговиот син

БИТОЛА - „Полициски инспектор го тепал мојот син со клоци по слабина во предистражна постапка“, се пожали вчера на полициска бруталност битолчанецот Томче Дамевски, татко на 21-годишниот Николче. Поради тоа, Дамевски ќе бара одговорност од полицаецот за кого најави кривична пријава.

Од СВР - Битола возвраќаат дека станува збор за наркозависник под метадонска терапија, кој прв физички го нападнал инспекторот. Досието на момчето е богато со кривични пријави за кражби, велат од битолската полиција, која против Дамевски поднесе уште една пријава, за напад на службено лице.

Николче Дамевски бил приведен во понеделникот, под сомнение дека учествувал во кражба. Според сознанија на таткото, ноќта по приведувањето, полициски инспектор брутално го натепал Николче, при што му нанел видливи повреди по телото. Таткото инсистирал да го види својот син, но тоа барање било одбиено. Затоа повикал лекари од Итната медицинска помош од Битола. Томче Дамевски тврди дека целиот случај е влезен во записник.

„Син ми го приведоа под сомнение дека крадел. Се јавија од полиција да му однесам храна, а тој се пожали дека инспекторот Венцо го тепал. Отидов кај водичите и им кажав, а тие ветија дека нема никој да го допре. Ама не било така. Наредниот ден го сретнав инспекторот и побарав да го видам детето, а тој и тогаш нечовечки се однесуваше кон мене. Ми рече дека ќе го видам синот кога тој ќе сакал“, вели Дамевски.

Таткото веќе три дена не го видел својот син. Загрижен, побарал лекари да ја констатираат здравствена состојба на Николче.

„Дека нешто не е во ред со Николче, ми потврди Ромка, која се нашла во иста ситуација и која од истиот инспектор била тепана со пендрек по грб. Таа кажа дека мојот син е повреден. Затоа инсистирав да дојде Брза помош. На излегување од полиција, лекарката рече дека ногата на Николче е преврзана и дека му оставиле лекови“, раскажува Дамевски.

Адвокатот, кој му го одредил судот по службена должност, го евидентирал случајот. Според битолската полиција, Николче бил познат криминалец. Од својата петнаесетта година добил дури девет кривични пријави за тешки кражби. И последниот пат бил приведен под сомнение за четири кражби. Кај него и кај негов другар полицијата нашла пари, златен накит, делови од оружје и муниција.

„Во моментот на приведувањето Николче физички нападнал еден од полициските службеници што разговарале со него. За да се доведе во состојба на послушност, врз него се применети мерки на присилба. Постоела процена дека во тој момент мерките се неопходни и законски оправдани“, изјави Ѓоко Стрезовски, портпарол на СВР - Битола.

Сепак, Стрезовски рече дека внатрешната контрола на МВР ќе ја испита оправданоста од употреба на средства за присилба против момчето. (А.Б.)