Фуриозен старт на Мартиноски на „Мерцедес опен“
Илија Мартиноски за само 50 минути ја заврши работата и се пласира во второто коло на 5. „Мерцедес опен“ во Скопје, со награден фонд од 10.000 американски долари. Дејвис куп репрезентативецот на Македонија, пријавен како 1013. на АТП-листата, го „избриша“ централниот терен на тенискиот комплекс Југ со осмиот носител Александар Мариќ (945.) од Босна и Херцеговина, препуштајќи му само еден гем, и тоа на почетокот од првиот сет.
„Бев сигурен дека ќе победам, но не очекував толку убедливо“, изјави најдобро рангираниот македонски тенисер на турнирот, кој му се раваншира на Мариќ за поразот во три сета на фјучерсот на тепих во Салцбург во јануари годинава. Следен противник на 18-годишниот прилепчанец, кој брани два поена од лани кога со победата над Лазар Магдинчев стигна до четврт-финалето, денеска ќе му биде Адријан Сикора (1129.) од Словачка.
Мартиноски одлично тргна и во двојки, каде што заедно со Шендрит Деари на стартот ги изненадија третите носители Парис Гемухидис од Грција и Пирмин Хенле од Германија, кои ги совладаа со 7-5, 7-5. Следни ривали им се Марко Беговиќ од Црна Гора и Анте Билиќ од Хрватска. (Р.Д.) |
