Магдинчев и Русевски посрамотени во Сомбор
Најдобрите македонски тенисери Лазар Магдинчев и Предраг Русевски, кои заедно се 611. на АТП-листата во двојки, си дозволија луксуз да загубат во полуфиналето на фјучерсот во српскиот град Сомбор, со награден фонд од 10.000 американски долари, и тоа од дубл рангиран дури 1018 места послабо од нив! Првите фаворити на турнирот го добија првиот сет со 7-6 (6) против третите носители Александар Словиќ од Србија и Горан Тошиќ од Црна Гора, но убедливо го загубија вториот со 6-2, а потоа со 10-8 и тај-брејкот по принципот кој прв до десет поени.
Магдинчев, Русевски, Илија Мартиноски, Димитар Грабулоски и Шендрит Деари од Сомбор се преселија во Суботица, каде што неделава ќе настапат на уште еден фјучерс од серијата турнири од најслаб ранг кај северниот сосед. Првите тројца се директно на главниот турнир, а Грабулоски и Деари ќе играат во квалификациите.
Најмладиот репрезентативец Томислав Јотовски и Васко Здравкин, пак, преку квалификациите ќе се обидат да се пробијат до главниот турнир на фјучерсот во бугарскиот град Добрич. (Р.Д.)
|
