Полуфинален фудбалски судир на Бразил и Аргентина
Во второто полуфинале ќе се сретнат Белгија и Нигерија
Двата јужноамерикански фудбалски џина Бразил и Аргентина сакаа да се сретнат во финалето на фудбалскиот турнир во Пекинг, но ќе мора одлуката за подобриот во моментов да падне во полуфиналето. И двете селекции местото меѓу четирите репрезентации го обезбедија дури по продолженијата.
„Кариоките“ во дополнителните минути го елиминираа Камерун со 2:0, додека „гаучосите“ се изборија за полуфинале, откако ја победија Холандија со 2:1. Регуларниот дел заврши со 1:1, со головите на Меси во 14 минута, и на Бакал во 36 минута. Во 105 минута од продолженијата Ди Марија стана херој на Аргентинците, по одличната асистенција на Меси. Во второто полуфинале ќе играат Белгија и Нигерија. Белгија ја шокира Италија со победата од 3:2, по која го чекаше победникот од дуелот Нигерија - Брегот на Слонова Коска. Нигеријците на крајот славеа со 2:0, со головите на Одемвинге во финишот од првиот дел и на Обина на 10. мин. пред крајот. |
