Леб седми пат најдобар во Германија
Себастијан Леб без поголеми проблеми стигна до својот седми триумф на релито во Германија, со кој се врати во водство во вкупниот поредок и ја продолжи трката за петтата титула во низа. Леб (34) го заврши натпреварот составен од 19 етапи за 3:26:20,3 часа, оставајќи го 47,4 сек. зад себе својот тимски колега од Ситроен, Даниел Сордо од Шпанија.
На пет трки до крајот на сезоната францускиот возач во генералниот пласман има четири поени предност во однос на второпласираниот досегашен лидер Мико Хирвонен од Финска, кој го заврши релито на четвртото место. Тој заостана 1:19,7 минути зад Леб, откако не успеа да го стигне својот тимски колега од Форд, Франсоа Дивал од Франција, кој го освои третото место. |
