Две деца се удавија во Претор
ПРЕТОР - Две малолетни момчиња од Ресен се удавија во водите на Преспанското Езеро кај туристичката населба Претор. Според полицијата, едно од удавените е Стивен Стојановски (15) од Ресен, а по второто момче се' уште се трага. Несреќниот случај се случил вчера околу 13.30 часот на оддалеченост од околу 150 метри од брегот на туристичката населба Претор.
Само неколку минути пред несреќата три момчиња од Ресен влегле во водите на езерото и со пливање се упатиле кон езерската длабочина. Набрзо потоа две од трите момчиња потонале кон дното, додека едното од нив успеало да исплива до брегот. Петнаесетгодишниот Стивен Стојановски од страна на присутните граѓани на брегот брзо бил извлечен од водата и веднаш бил повикан лекар од Службата за итна медицинска помош да му помогне. Но, за жал, само била констатирана смрт со давење. Второто момче, чиј идентитет засега не е точно утврден, се' уште е во водите на Преспанското Езеро.
Поради тоа, Секторот за внатрешни работи побара помош од нуркачката екипа на МВР. До доцна попладнето се трагаше по удавеното момче и со пловен објект на граничната полиција од Стење се вршеше пребарување на езерото. (А. Б.)е' |
