Претходен број

Кавга на газди ја поништи „Градски аптеки“

Сопствениците на „Зегин“ и „Фармакорп“ се скарале за избор на директори

Јасмина Јовановска

Скопскиот Основен суд ја поништи приватната здравствена установа „Градски аптеки“ од Скопје. Ваквата пресуда е донесена затоа што сопствениците на „Градски аптеки“, „Зегин“ и „Фармакорп“, не можеле да се усогласат околу управувањето со установата. Повеќе од шест месеци газдите не успеале да именуваат двајца од тројца директори согласно со договорот за основање на приватната установа. Со ова, фирмата не може да функционира, а вработените четири месеци се без плата. Аптеките се' уште работат, но рафтовите се празни, а пациенти ретко влегуваат за да побараат лек.

Пресудата е епилог на неколкумесечни недоразбирања и борба за имот на двајцата газди. Кавгата заврши на суд и тоа по тужба од „Зегин���. И двајцата газди не се за уништување на аптеките, но дека не можат да се усогласат покажуваат и различните толкувања за пресудата.

За сопственикот на „Зегин“, Благоја Механџиски, со ваквата пресуда за „Градски аптеки“, конечно, ќе може да се стави крај на голготата и ќе се расчистат работите. „Градски аптеки“ е жртва на корупцијата во судството, коментира другиот газда, Тодор Костадинов, директор на „Фармакорп“. Тој ќе се жали до Апелациониот суд за начинот на водење на судската постапка.

„Со пресудата, согласно со законот, ќе може да се изврши поделба на имотот, долговите и вработените според тоа кој колкав удел има во сопственоста на имотот“, вели Механџиски.

„Но, прво, на ортакот ќе му понудам да ги санираме аптеките, за што ви согласност си договорот треба да се донесат свежи пари од дома“, вели Механџиски. Долгот на „Градски аптеки“, според него, е околу 3,7 милиони евра. Доколку не го прифати ова другата страна, со поделбата „Зегин“ ќе земе 48 отсто од долгот, вработените и од имотот на „Градски аптеки“ колку што е неговиот удел во нив и ќе продолжат да работат самостојно.

Понудата за поделба Костадинов не ја прифаќа, кога тие имаат поголем удел од „Зегин“ и тоа 50 отсто. „Мора да се стави крај на корупцијата и на опструкциите во ’Градски аптеки‘“, вели Костадинов и додава дека освен што ќе се жалат до Апелациониот суд, ќе поднесат пријава до Антикорупциската комисија.

„Најавите за спас на ’Градски аптеки‘ се само декларативни, кога заднината е јасна, да се уништат заради конкуренцијата“, појаснува Костадинов. Тој нагласува дека со месеци „Зегин“ врши опструкции околу Акционерското собрание и затоа не можат да функционираат аптеките.

Механџиски, пак, тврди дека не врши опструкции и ја напаѓа „Фармакорп“ дека не знае да работи со аптеките, туку дека само ги уништува. „Не може да се спасуваат аптеките со давање имот под хипотека“, додава Механџиски.