Претходен број

Во Италија се лее Aлександар Mакедонски

И покрај рецесијата, македонскиот војсководец, четирите лава и пет споменици се леат во Италија

Деспина Трајковска

Рецесијата ,дефинитивно, го запре леењето на десетина споменици предвидени да се постават во центарот на градот. Подобри финансиски времиња за да се изработат ќе чекаат спомен-обележјата на Јустинијан Први, свети Кирил и Методиј, свети Климент и Наум, спомен-обележјето на Карпош и на гемиџиите. Сепак, актуелната економската криза не ја стопираше изработката на споменикот на Александар Македонски, четирите лава што ќе го красат мостот „Гоце Делчев“, коњаничките скулптури на Гоце Делчев и Даме Груев, а во тек е и изработката на спомен-обележјата на цар Самуил, Методија Андонов-Ченто и бронзената скулптура на Никола Карев.

Владимир Тодоровиќ, градоначалникот на Општина Центар, тврди дека освен овие споменици, Општината во двете избрани италијански леарници не нарачала изработка на останатите предвидени десетина спомен-обележја. Нивното леење е ставено на „стенд бај“, најверојатно, се' до излезот од актуелната економска криза.

„Кризата нормално дека влијае и на овој проект. За споменикот на Александар Македонски, лавовите и уште пет споменици имаме дадено аванс а обезбедени се и парите за целосна нивна исплата откако ќе бидат готови. Тоа значи дека нема причина нивната изработка да доцни“, вели Тодоровиќ без да прецизира до каде е изработката на спомениците и кога може да се очекува нивно поставување. Вели неблагодарно е да лицитира со термини, но, сепак, очекува фонтаната на која ќе се постави Александар Македонски качен на коњ да почне да се гради на 1 октомври. Дали ќе се исполнат овие предвидувања, пред се', зависи од дислокацијата на подземните инсталации изградени во времето на Ристо Пенов за потребите на фонтана во форма на обелиск, проект кој поради финансиски причини беше прекинат од ексградоначалникот Трифун Костовски. Тодоровиќ смета оти изградбата на фонтаната, работа која му е доверена на „Бетон“, ќе започне 15 дена откако ќе заврши дислокацијата. За неа, пак, е одговорен Градот Скопје.

„Фирмата ’Вардар градба‘ е избрана за предвидените активности. Кога ќе почне дислокацијата и колку ќе трае немаме информација. Исто така, не можам да потврдам дали постојните инсталации ќе се дислоцираат и ќе бидат во функција на планираната фонтана со споменикот или, пак, целосно ќе се отстранат“, изјави вчера Неделчо Крстевски од кабинетот на градоначалникот Коце Трајановски.

Неодамна, пак, од Општина Центар рекоа оти, најверојатно, се' што било изградено за потребите на фонтаната на Пенов, ќе треба да се уништи и практично „ќе паднат во вода 200 илјади евра колку што беа потрошени за изградба на подземната машинска работилница, резервоарот за вода, двете простории наменети за електрика и за други придружни елементи.