Претходен број

Поглед

Прилеп во Скопје

Сања Наумовска

Центарот на Прилеп е најважната локација што треба да ги привлече туристите во Скопје! Така барем препорачува најновиот Туристички водич кој пред два дена го промовира Градот Скопје. На првите страници од изданието се наоѓа слика на споменикот на Александар Македонски со огромното копје што се наоѓа во Прилеп. Образложението за овој потег дојде од издавачката куќа „Тримакс“, каде што објаснија дека, за жал, Скопје се' уште нема свој споменик од војсководецот.

Значи, повеќе од јасно ни станува дека ако веќе беше поставен скопскиот Александар, тој ќе беше првата работа со која ќе се пофалевме пред туристите. Задоцнил малку за да биде првата атракција во главниот град. Пред нашите преубави и стари цркви или џамии од кои пулсира историјата, пред прекрасната природа на Матка, пред Скупи, пред Калето и многу други културни, историски и природни споменици и убавини што се наоѓаат во Скопје или околината.

Александар и нашата опседнатост со нашата античка историја, очигледно, засенува се', па дури по цена Прилеп да е првата претстава за Скопје. Не е прв пат Градот Скопје во своите досегашни брошури и туристички водичи да вметнува информации за убавините на Охрид, езерото, црквите и археолошкото богатство, Преспа и Големиот Град, за планините или историјата на земјата. Ќе беше в ред да се спомене и Прилеп, па дури и споменикот на Александар. Сепак, начинот на кој е претставен во најновиот водич е гротескен.

Скопје не е најубавиот и најбогат град во регионов, но секако дека има што да покаже. И со што да привлече туристи, без прилепскиот, па и без скопскиот Александар.