Индија пресиромашна за домаќин на ОИ

Надежта на Индијците дека нивната земја би можела да биде домаќин на Олимписки игри во блиска иднина ја уништи министерот за спорт Манохар Синг Гил, кој изјави дека државата е премногу сиромашна дури и за да ја разгледа таа идеја. Индија ќе биде организатор на Игрите на Комонвелтот следната година и претседателот на Индиската олимписка асоцијација, Суреш Калмади, изјави дека неговата земја би можела да се кандидира за ЛОИ 2020 ако се покаже успешна во организацијата на спортскиот настан во Њу Делхи.

„Не сум сигурен дека Индија би требало да размислува за Олимпијада. Погледнете ја сиромаштијата тука“, се обрати Гил во парламентот. „Некои од моите колеги во парламентот и луѓе надвор од него често велат дека ние би требало да се кандидираме за ОИ. Јас не мислам така. Кина потроши 50 милијарди долари за Игрите во Пекинг. Подготвени ли сте да потрошите толку многу?“.

Индија, држава со 1,2 милијарди луѓе, е втората најбрзо растечка економија по Кина и на Игрите на Комонвелтот во октомври 2010 гледа како на можност да го прикаже Њу Делхи како главна глобална дестинација. Државата двојно го зголеми буџетот за Игрите, кој сега е 344 милиони долари, а Гил во Горниот дом изнесе проценка дека трошоците само за објектите за тренинг и за натпревар ќе бидат 888,5 милиони долари.

Домаќинот беше изложен на силни критики по одложувањата на довршувањето на инфраструктурата за Игрите на Комонвелтот.