УО на клубот останува на ставот за укажаните неправилности на саботното Собрание

Сашко Ѓ. Димовски


Хоризонт Турново го прекинува бојкотот и се враќа во првенството. Потврда на ова стигна од првиот човек на клубот, Орце Тодоров, а одлуката, како што вели тој, е донесена едногласно на состанокот на управниот одбор на турновци во вторникот доцна вечерта. Фудбал во Турново ќе има во недела кога треба да гостува Милано, но незадоволство од саботното Собрание на Фудбалската федерација на Македонија (ФФМ), неприфаќањето на кандидатурата на Масар Омерагиќ за вклучување во претседателската трка и нелегитимноста на делегати од одредени општински фудбалски сојузи (ОФС) останува.

„Управниот одбор на Хоризонт Турново едногласно одлучи да се прекине бојкот и клубот да се врати во редовните фудбалски обврски во шампионатот. Одлуката ја донесовме самостојно, без притисоци од страна. За ваквиот наш став известивме некои луѓе во раководствата на Македонија Ѓорче Петров и Слога Југомагнат, клубови со кои ние се солидаризиравме во неделата. Апел до нив да го следат нашиот пример. Сакаме што поскоро да се надминат недоразбирањата, но воедно упатувам апел и до Фудбалската федерација на Македонија да свика состанок на сите прволигаши, да разговараме и да почнеме да ги решаваме проблемите“, ни изјави претседателот на Хоризонт Турново, Орце Тодоров.

Турновци се решени да ги остваруваат своите права и да делуваат во рамки на Статутот на ФФМ, но истовремено не ја исклучуваат опцијата за повторен бојкот доколку не наидат на разбирање кај ФФМ за нивните забелешки.

„Сфативме дека тоа не е начин за решавање на проблемите. Никој од клубовите што не играа во неделата не е во право. Меѓу нив бевме и ние. Тоа е мој личен став. Признавам дека погрешивме, бојкотот нема да ги реши проблемите, но стоиме на ставот за укажаните неправилности на Собранието во саботата“, вели Тодоров, кој апелира до раководството на ФФМ за повторно воспоставување линк со клубовите и одржување на состанок каков што нема од почетокот на оваа година.