Претходен број

Обвинителството ја прекина истрагата за „двојниците“

Еден од „двојниците“: Јован Манчевски

МВР тврди дека изјавите на „двојниците“ од СДПМ не се фалсификувани

Билјана Јовановска

Два дена пред изборите, поточно минатиот петок, Министерството за внатрешни работи го информираше Скопското јавно обвинителство дека извршиле вештачење на ракописите во изјавите на двајца двојници од СДПМ, кое потврдило дека не станува збор за фалсификати.

Наспроти првичните изјави на извесна баба Рада Шекерова од Штип, која претседателот на СДПМ, Бранко Јаневски, ја кандидирал како носител на листа во „единицата“, каде што беше и Радмила Шекеринска, лидерката на СДСМ, потоа Јован Манчевски од Прилеп, носител во „двојката“, каде што требаше да му ги земе гласовите на Јован Манасиевски, и „дублерите“ со иста задача - Игор Ивановски, Јанис Макрис и Зоран Зашев, МВР не откри ничија вина. Не им значеа ништо ни изјавите на некои од „двојниците“ кои јавно тврдеа дека немаат поим оти некој ги злоупотребил нивните имиња и ги кандидирал. Луѓето и навистина немаа врска со политиката, ама „случајот“ заврши во полза на коалицијата „За подобра Македонија“, на која и' припаѓаше СДПМ. Сега, кога победата е убедлива, само на прв поглед отворањето на ова прашање е депласирано. Но, фактите го говорат спротивното.

Штипската баба, која е тотален анонимус и во Скопје и во политиката, на овој трик успеа да собере дури 1.814 гласа, додека сите „дублери“ повлекоа вкупно 6.000 гласа, што воопшто не е мала бројка и не е работа која не треба да загрижува. Особено што ваквите махинации на СДПМ не се случуваат првпат.

Како се чувствува баба Рада која на името и презимето „налепи“ три пати повеќе гласови отколку „нејзиниот лидер“ Јаневски, вчера не успеавме да дознаеме. Само навидум „незначителните“ 6.000 гласа, кои помалку внимателните гласачи преку „дублерите“ ги прелеаја во СДПМ, нивните противници од „Сонце - коалиција за Европа“ ги чинеа најмалку два-три мандата. Или, на овој начин коалицијата „За подобра Македонија“ доби два-тројца пратеници плус. Во меѓувреме, Илинка Митрева, како шесторангирана на изборната листа, остана без пратенички мандат зашто и' недостасуваа само 214 гласа. Ист е случајот со Емилијан Станковиќ од „четворката“ и со Гордана Кожуварска од „петката“.

Скопскиот јавен обвинител Стерјо Зиков вчера ни потврди дека по известувањето од МНР ја прекинал постапката. Откако МНР рече дека не��а фалсификат, вели, остана само моралната одговорност на „двојниците“ која не е во надлежност на Обвинителството. Зиков повтори дека постапката за овој случај ја отворија по „допрен глас“ на јавноста, односно „по написите во печатот во кои кандидатите изјавуваа дека не биле консултирани, ниту знаеле за кандидатурата, што посочуваше дека имаме кривично дело фалсификување потписи“.

Случајот со „двојниците“ е евидентиран и во извештајот на набљудувачите од ОДИХР/ОБСЕ што се изготви за овие избори.