Претходен број

ЕДИТОРИЈАЛ

И МВР ја оплеска

Даниела Трпчевска

Македонија сама си удри шлаканица во неделата. Не ни почекавме некој друг да не' искуди за валканиците, за примитивното однесување и безобразлакот што излезе на виделина за време на гласањето на дваесетина избирачки места.

Не треба ниту некој да ни ја кубе косата и да ни вперува прст пред очи за да не' искара што не научивме ниту една лекција по демократија. Сами се казнивме. Сега сме подалеку од НАТО и од Европа отколку што можевме некогаш и да претпоставивме.

За тоа колку е оплескана работата говорат над седумдесетте кривични пријави за изборните инциденти кои се случија на неделните избори, а кои полицијата ги поднесе за само четири дена. Тоа е само едниот дел од обврската која меѓународната заедница и' го постави како услов на власта. Таа не само што ќе треба итно да расчисти со силеџиите што го нарушија изборниот процес, туку ќе треба да ги открие и да ги санкционира и „лошите момчиња“, кои место да го штитат законот, штителе партиски интереси.

Поради огромниот притисок од јавноста, но и по острите забелешки што ги упати амбасадорката на САД Џилијан Миловановиќ, првите луѓе на МВР ќе мора да ги посочат виновниците во своите редови, кои го доведоа во прашање угледот на земјава. Паралелно со апсењето на партиските тепачи и полначи на кутии, ќе треба да се обелоденат и луѓето во униформа кои ги штителе, прикривале или учествувале во изборните малверзации. Па, дури и оние (доколку има такви) што мирно стоеле и не реагирале додека се полнеле кутии со веќе однапред подготвен материјал ќе треба да си понесат свој дел од вината што не го спречиле криминалот кој се одвивал пред нивните очи.

Досега за само тројца од нив се најавува отказ поради учество или планирање изборни инциденти. Но, најверојатно, ова не е конечната листа на виновници. МВР се' уште бара цврсти докази за да ги суспендира своите „одметнати припадници“, поради што не се знае точната бројка на полицајци кои ќе бидат суспендирани или ќе добијат отказ за оцрнувањето на својата професија. Сепак, и покрај забелешките за однесувањето на дел од полицијата, нивната шефица смета дека потфрлиле политичките лидери, а не полицијата која во најголем број чесно ја завршила својата работа. Првата полицајка Гордана Јанкулоска деновиве одговорноста ја лоцираше кај политичките лидери кои не го зауздале своето членство. „Потфрлија политичките лидери, чии членови и симпатизери не ги почитуваа насоките дадени и од политичките раководства и од меѓународната заедница“, е ставот на министерката. Аналитичарите, пак, го вперуваат прстот на вината кон полицијата која, според нив, не само што не помогнала во спроведувањето фер и демократски избори, туку демонстрирала дека и покрај реформите, се' уште е само партиска полиција.

И додека двете страни се препираат кој е виновен за пукањето и полнењето кутии, во изборниот тефтер ова гласање ќе остане забележано како најсрамно и најкрваво, при што едно лице го загуби животот, а десетина беа повредени. Како што вели претседателот на Хелсиншкиот комитет Исо Руси, во неделата не се знаеше ниту кој пие, ниту кој плаќа. Ниту кој полни кутии, ниту кој ги краде од пред очите на меѓународните набљудувачи.

Но, она што е најматно во целата ситуација е што се' уште не се знае дали „ебрите“, „алфите“ и другите полициски единици, кои во рекорден број беа распоредени на гласачките места, во неделата го штитеа законот, беа неми набљудувачи на изборните нерегуларности, или можеби се ставија на страна на партиските интереси. Полицијата во 15 јуни има шанса да си го обели образот. Дотогаш ќе треба да се исчисти од партиските структури во своите редови, да ги казни оние што сееле страв на избирачките места и да создаде клима за фер и демократско прегласување на местата на кои искршените и украдените кутии ќе се заменат со нови.