Претходен број

Нема полни автобуси, ама грчките плажи не се заборавени

Интересот за летување во Грција е драстично намален. Граѓаните ги бираат Турција, Бугарија, Хрватска

Нина Нинеска - Фиданоска

Турција и Бугарија, а може и Хрватска, наместо Грција. Ваква замена одлучија да направат најголем дел од македонските граѓани, избирајќи ја својата дестинација за годишен одмор за оваа сезона. Туристичките работници велат дека за ова лето е драстично намален интересот за грчките плажи, како последица на ветото во Букурешт. Но, дел од нашата популација, сепак, одлучи да летува во Грција. На песокот кај нашиот грчки сосед веќе се сончаат втората група македонски туристи.

Првите луѓе на туристичките агенции во земјава велат дека оваа сезона најмалку за 50 - 70 отсто е намален интересот за летување во Грција во споредба со претходното лето. „Порано сезоната ни почнуваше веќе од 25 мај, кога се полнеа автобусите за Грција. Сега го нема тоа “, се жалат дел од туристичките работници. Но, додаваат дека интересот, иако срамежливо, сепак, секојдневно се зголемува.

Некои од нашите туристи кои ќе сакаат да заминат на одмор во Грција ќе треба да платат и нешто повисоки цени за аранжманите отколку претходните години, и тоа за околу 10 отсто.

Но, сите претставници на туристичките агенции со кои контактираше „Утрински весник“ се едногласни во тврдењето дека наидуваат на максимално добра соработка со грчките партнери. И тие, свесни дека политиката му нанесува големи штети на бизнисот, гледале колку што може покоректно да се договорат со нашите агенции, само со цел да се најде начин да продолжат да доаѓаат барем дел од туристичките групи од Македонија. Токму од тие причини и не барале стриктно договори за фиксен закуп, туку се согласувале и на поединечни аранжмани.

„Грчките партнери целосно ни излегоа во пресрет за Велигден и за 1 Мај, кога ги откажавме аранжманите. Тогаш откажавме речиси 95 отсто од аранжманите. Тие до денар ни го вратија капарот, така што не изгубивме практично ништо. Истото искуства ни ги пренесоа сите туристички агенции во земјава“, вели Миле Спировски, сопственик на туристичката агенција „Турист“ од Битола и претседател на Асоцијацијата на туристички агенции на Македонија - АТАМ.

Според него, во пресрет на летната сезона, претходната неповолна ситуација веќе почнува да се нормализира. „Веќе има наши граѓани кои летуваат во Грција. Според сознанијата од одредени агенции, веќе се заминати туристи на Халкидики и на Тасос, како и на ривиерата под Олимп. Навистина е намален интензитетот на туристите, но може да се каже дека тој секојдневно се зголемува“, вели Спировски.

Тој децидно ги демантира шпекулациите што се проширија во земјава дека, наводно, одредени грчки сопственици им рекле на нашите агенции „ви го враќаме капарот, не ни требаат ни пари, ни вашите туристи“.

„Тоа е апсолутна невистина. Такво нешто не сум слушнал од ниту една од нашите членки. Напротив, имаме одлична соработка со нашите грчки партнери. И нив и нас не не' интересира политика. Сега и тие и ние вадиме жешки костени и правиме се' за да се нормализира туристичката соработка. Токму од тие причини некои од нив не бараат договори на фиксен закуп, туку колку ќе продадеме аранжмани, толку да им платиме“, потенцира Спировски.

Според него, ова е причината што кај дел од аранжманите може малку да се зголемат цените, за околу 10 проценти. Имено, грчките партнери не инсистираат секогаш на фиксен закуп, но во тој случај мора да нудат апартмани по повисока цена, бидејќи имаат помала сигурност.

Спировски вели дека некои од нашите агенции, сепак, си останале на фиксниот закуп, во очекување дека ќе има доволно туристи за Грција.

И Стеван Пешевски, менаџер на туристичката агенција „Савана“, нагласува дека интересот за летување во Грција е ограничен. Според пресметките, тој е намален за 50 - 70 отсто во споредба со претходните години. „Граѓаните сега најмногу ја бараат Турција, но и Црна Гора, Хрватска и Бугарија“, вели Пешевски. Во врска со цените на аранжманите со Грција, тој вели дека тие најмногу ќе зависат од видот на договорите со грчките партнери. Пешевски, исто така, демантира дека, наводно, грчките партнери не сакале соработка со нашите агенции и им ги враќале парите. „Тоа воопшто не е точно. Тоа се конструкции. Ние со тие луѓе работиме веќе 20 години и такво нешто не се случило“, потенцира Пешевски. Тој додава дека веќе има гости во Грција и досега никој не се пожалил на ништо.