ДИК заглави со приговорите на ДПА
Времето е прекусо за сериозно да се разгледуваат приговорите на другите партии и коалиции
Катица Чангова
Државната изборна комисија вчера „заглави“ со приговорите на Демократската партија на Албанците. Седум часа потроши врховното изборно тело детално занимавајќи се само со приговорите на ДПА, која беше незадоволна од гласањето во 131 гласачко место.
Со оглед на истекувањето на законските термини за разгледување приговори, вчера во 19 часот, веќе постоеше сомневање дека ДИК или нема да успее да ја заврши работата, што би било скандалозно, или дека ќе „претрча“ преку приговорите на другите партии и коалиции. Коментарот на ДИК што ќе се случи ако ги пробие законските тајминзи беше лаконски: „нема одговори пред да заврши рокот“.
Партијата на Мендух Тачи поднесе 15 приговори кои се однесуваа на нереални разлики во гласовите, на полнење гласачки кутии, на недостиг од оригинални записници и печати на ливчињата, гласање под притисок, групно гласање или гласање во име на друг. ДПА приговараше за изборите на некои локации во Јегуновце, Зајас, Осломеј, Гостивар, Кичево, Теарце, Пласница, Врапчиште, Брвеница, Бутел, Сарај, Чаир, Студеничани...
За да донесе мериторна одлука, ДИК ги прифаќаше барањата на членовите и на овластените партиски претставници за јавен увид во обемниот избирачки материјал од одредени гласачки места. Тоа беше причина за арчење на драгоценото време додека во собраниската сала се донесат ќесите за избирачкото место. Притоа стручната служба на ДИК броеше гласачки ливчиња и ја проверуваше веродостојноста на избирачкиот материјал.
Вчера до затворањето на весникот се' уште не се знаеше што ќе се случи доколку ДИК го пробие рокот и не ги отвори приговорите на коалициите и на политичките партии онака како што го направи тоа за ДПА.
Со гласање ДИК донесе одлуки за поништување на гласањето на некои избирачки места, меѓутоа дополнително ќе се знае дали ќе се прегласува на 15 јуни. Од ДИК објаснија дека ќе се повтори гласањето само таму каде што ќе проценат дека има влијание на изборниот резултат, односно на пратеничките мандати.
Државната изборна комисија до вчера во 19 часот требаше да разгледа 59 приговори. Под претпоставка да ги прифати сите, тогаш гласањето ќе биде повторено на повеќе од 300 гласачки места во Првата, Втората и Шестата изборна единица. Тоа би имало влијание на изборниот резултат, односно на пратеничките мандати.
С��оред евиденциите, ДУИ поднесе 13 приговори за 139 места, ВМРО-ДПМНЕ има 28 приговори за неправилности при гласањето на 65 избирачки места, а „Сонце - коалиција за Европа“ подготви еден приговор за гласањето на 38 избирачки локации.
Во овој број и:
ДПА најавува повлекување од прегласувањето |
