ЕДИТОРИЈАЛ

Крв за владиниот jубилеj

Соња Крамарска

Не можеше да и' се случи полошо време на Владата на Македонија да го слави четиригодишното владеење. Незадоволен коалициски партнер ДУИ, крвава пресметка во Скопје со настрадани, од кои некои се сметаат за блиски до кликата околу премиерот Груевски. Или попрецизно, мртов припадник на полицијата и сомневања за негово учество во криминални бизниси.

Такв�� сценарио не можеа да смислат ниту оние од крилото на ДУИ што заговараат раскинување на партнерството со ВМРО-ДПМНЕ. Ниту најжестоките противници на Груевски не можеа да претпостават дека вечерта спроти презентирањето на аргументите за успесите на Владата, ќе се случи неверојатно брутална крвава пресметка. И тоа судир во кој на самото место под сомнителни околности ќе биде застрелан полициски припадник, близок до највисоките структури на ВМРО-ДПМНЕ.

Груевски, кој еднаш веќе ја одложи прес-конференцијата за отчет на владиното работење, се наоѓа во многу непријатна ситуација. Ако се покажат точни првичните информации дека припадници на Шестата управа, која се занимава со обезбедување на политички функционери, се учесници и жртви на пресметки на подземјето, ќе мора да ги засука ракавите. Ќе биде неопходно да ја повика на рапорт и својата омилена министерка Гордана Јанкулоска, чија позиција во Владата е цврста токму поради довербата што и' ја дава премиерот.

И можеби, конечно, Груевски ќе се реши да посегне по она што е главен политички инструмент во рацете на секој премиер: проветрување на Владата од министри кои на кој било начин и' штетат на нејзината работа, имиџот или на стабилноста што ја испорачува на државно ниво. Всушност, крвавиот четврток од завчеравечер е алармот што треба да го поттикне на акција претседателот на Владата, доколку не сака работите сосема да му излезат од контрола.

Гледано во тој контекст, повеќе од јасно е дека во ден каков што беше вчерашниот, мрачното расположение на граѓаните не може да се подобри со никакви изјави за субвенции во земјоделството, отворање нови индустриски капацитети, ширење на образовниот процес, што се дел од реториката на премиерот. Вчера и денес главна тема се убиствата во Аеродром и што ќе преземе Владата за расчистување на овој брутален чин на насилство. Не може да биде тема успешното четиригодишно владеење на ВМРО-ДПМНЕ како што тоа го замислија партиските и владините стратези за пропаганда.

Груевски, чиј политички стил е дисперзија на неговата власт во сите пори на општеството, преку најлош можен пример сфаќа дека моќта не значи воедно и способност и можност да се држи се' под контрола. Напротив, тогаш кога мислиш дека ја остваруваш нејголемата контрола, се случуваат шокови што целосно изместуваат од рамнотежа и предизвикуваат потреси од незамисливи димензии.

Од вчера е јасно дека во Македонија, покрај политичките проблеми на внатрешен план, се отвораат и безбедносни проблеми. Скопје веќе не е безбеден град за живеење, а некои од другите градови во внатрешноста веќе одамна го поминале прагот на безбедноста. Охрид, на пример, кој требаше да биде гордоста на Македонија и град каде што ќе се гледа ликот на македонските граѓани, а се претвори во крвава калдрма. Криминални банди шетаат по улиците. Полицијата се' почесто е учесник во хулигански пресметки.

Ќе излезе ли на отчет министерката за внатрешни работи Гордана Јанкулоска? Атмосферата во земјата не е таква за премиерот да дава отчет. Некако повеќе личи полицискиот врв да излезе пред граѓаните и да им реферира што сработил во изминатите четири години. Кога веќе најголем дел од парите на даночните обврзници одат на сметката на Министерството за внатрешни работи.

Дојдено е време за итна акција на Владата. Не со излегување на прес-конференција, туку со преземање мерки што ќе ја вратат довербата на граѓаните кон институциите на системот. Во спротивно, на Груевски брзо ќе му стане јасно зошто паднаа Бучковски, Црвенковски, Георгиевски...