Изложба

Фотографија, фудбал и магија

Иако фотографијата вреди илјада збора, на фоторепортерите понекогаш им е малку и таа илјадарка кога ја раскажуваат приказната за добрата фотографија. Фоторепортетрските приказни, оние „оф рекордс“, знаат да бидат поинтересни од новинарските, а повистинити од рибарските - затоа што фотографијата, запрениот миг од вечноста, ја имаат како аргумент.

Цела изложба со фудбалски фотоаргументи подготви фоторепортерот на „Утрински весник“, Петр Стојановски, која од недела, 5 септември, во Музејот на град Скопје ќе ја открива скриената магија на фудбалот. И тоа не онаа магија на помодна најважна споредна работа на светот, туку онака како што Петр ја чувствува магијата на фудбалот - како вистински најважна работа на светот. Како фоторепортер на дневен весник (од 1999 година, Петр Стојановски од самиот почеток е дел од „Утрински весник“), дијапазонот на настани што ги регистрирал неговиот фотообјектив е широк како животот. Но, кога станува збор за фудбалската фотографија, објективот на Перо е широк како љубовта. За вистински фудбалски миг Перо е во состојба да кисне по стадиони - и метафорички и буквално, да патува без сон со часови, дури и да побара слободен викенд за фудбал од своите најмили Наташа и Матеа... Новинската фотографија за Перо е професија, а фудбалската - професионална страст.

Како член на навивачката група „Комити“ од нејзиното формирање во 1987 година, навивачите беа инспирација за неговата прва самостојна изложба ��о 2004 година - „Досие навивач“. Веќе оваа втора изложба е насловена како „Фудбал и магија“, а е приредена под покровителство на Фудбалската федерација на Македонија. На отворањето на изложбата се очекува да се појави целата фудбалска репрезентација на Македонија, на чело со Горан Пандев.

Оваа изложба на Петр Стојановски, меѓу другото, е и убава можност фудбалот да се доживее во салонска варијанта преку музејска изложба! (Ј.П.)