Љупчо Георгиевски: Македонскиот народ е бомбардиран со лаги

„Она што сакаат денес да ни го наметнат како државна политика за античка Македонија јас го нарекувам карикатура, карикатура на историјата, затоа што нема врска“, изјави Љупчо Георгиевски, поранешен премиер и лидер на ВМРО-ДПМНЕ, а сега почесен претседател на ВМРО-НП, во неделното интервју на Радио Слободна Европа. Македонскиот народ е бомбардиран секојдневно со лаги, со дезинформации, со документарни филмови, вели тој, каде што гледаме грчка историја која ја препишуваат и ја модифицираат. „За мене е многу јасно дека има очигледна поделба на она што се нарекува античка историја на Македонија и словенска историја. Се' уште ја бранам тезата дека она на што можеме да се потпреме, а да не згрешиме е словенскиот идентитет, со втемелувачите на духовен план, со свети Кирил и Методиј, свети Климент, свети Наум. Тоа е таа историја каде што можеме единствено сериозно да газиме“.

На прашањето дали оваа Влада е способна за компромис со Грција, заради евроатлантско интегрирање, тој одговара: „Не, дефинитивно, не гледам ниту еден знак од македонска страна. Тоа го судам според оние државни новинари кои секојдневно ја пропагираат политиката. Меѓутоа, не мислам дека и Владата нешто друго размислува, различно од она што го гледаме преку државните новинари и државната медиумска пропаганда. Ако судам според тоа, можам да кажам дека овие четири години ќе поминат во празно и дека оваа Влада, најверојатно, ќе добие уште едни избори благодарение на силната одбрана на името“, изјави Љупчо Георгиевски во интервју за Радио Слободна Европа. (Д.Р.)