Второто место на Западот поблиску за Далас, подалеку за Денвер

Маверикси го совладаа Сакраменто со 126:108, нивните конкуренти, нагетси, загубија од Сан Антонио со 104:85

Далас го искористи киксот на Денвер и со победата над Сакраменто со 126:108 е на чекор до обезбедување на посакуваното второ место во западната конференција пред стартот на разигрувањето за шампионскиот прстен во НБА лигата. Уште на полувреме Новицки и дружината направија солидна предност од 11 поени разлика кое до крајот го зголемија на комотни 18. Германскиот интернационалец забележа 39 коша и 7 скока, во лидерството на маверикси му помогна и Џејсон Тери со 25 поени и 6 асистенции.

Нагетси доживеаја пораз од Сан Антонио со 104:85 по кој не само што ја губат битката со Далас за втората позиција на западот туку многу тешко ќе ја одбраната и титулата во нивната северозападна дивизија во која во моментот имаат идентичен биланс со расположените момчиња од Јута. Тим Данкан беше прво име кај спарси со 18 поени и 10 скока, предводник на Денвер беше Чонси Билапс со 27 коша.

Задоволство и еуфорична атмосфера владее во составот на Атланта. „Јастребите“ го совладаа Вашингтон со 105:95 и ја надмина границата од 50 победи во една сезона која псоледен пат ја достигнаа пред 12 години. Џамал Крафорд со 28 коша и Џое Џонсон со 20 беа најефикасни во победничкиот тим, Блаче уфрли 24, Јанг 23 за визардси.

„Задоволен сум без сомнение. Дојдов овде за да ја освојам шампионската титула“, порача тренерот на Атланта, Мајк Вудсон.

Резултати (недела): Шарлот - Детроит 99:95, Индијана - Њу Џерси 115:102, Вашингтон - Атланта 95:105, Мемфис - Филаделфија 101:120, Милвоки - Бостон 90:105, Денвер - Сан Антонио 85:104, Сакраменто - Далас 108:126, Лос Анџелес Клиперс - Голден Стејт 107:104.

Резултати (сабота): Орландо - Њујорк 118:103, Филаделфија - Милвоки 90:95, Атланта - Торонто 107:101, Бостон - Вашингтон 96:106, Кливленд - Индијана 113:116, Мајами - Детроит 99:106, Минесота - Лос Анџелес Лејкерс 88:97, Њу Џерси - Чикаго 127:116 (по две продолженија), Њу Орлеанс - Јута 103:114, Оклахома - Феникс 96:91, Хјустон - Шарлот 97:90, Сан Антонио - Мемфис 99:107, Портланд - Далас 77:83.



Аренас поЧна да издржува

затворска казна



Организаторот на играта на Вашингтон, Џилберт Аренас, почна да издржува затворската казна поради носење пиштол во соблекувалната на визардси.

Според Артур Валенштајн, директор на затворската служба во округот Монтгомери, Аренас пристигна во окружниот затвор каде минува низ дводневни медицински прегледи пред да биде преместен во затвор од полуотворен тип каде ќе ја издржува казната.

Поради внесување оружје во арената на Вашингтон, на Аренас на 26 март му беше изречена казна според која 30 дена тој ќе мора да се појавува во дневниот центар за затвореници кои во САД се користат за прекршочно казнување и ресоцијализација пред ослободување.

Кошаркарот на Вашингтон во јануари призна дека е виновен за недозволено поседување оружје.



Џинобили во Сан Антонио

до 2013 година



Аргентинскиот кошаркар, Емануел Џинобили (32), го продолжи договорот со Сан Антонио, вреден 39 милиони американски долари, до 2013 година.

Џинобили е член на спарси од 2002 година. Им се придружи од италијанскиот тим Киндер и во изминатите осум сезони освои три шампионски прстени во НБА лигата (2003 година, 2005 и 2007). Во просек по натпревар бележи по 16,5 коша, 4,9 асистенции и 3,8 скока.

„Непотребно е да се трошат зборови за неговото значење во нашата екипа.Среќен сум што уште некое време ќе остане со нас“, рече Грег Попович, тренер на Сан Антонио.