Погребани двајцата израелски војници убиени од Хезболах
Елдад Регев и Ехуд Голтвасер се верува дека загинале кога влегле во заседа во 2006 година
ЕРУСАЛИМ - Во Израел со воени почести беа погребани војниците кои беа вратени од Либан како дел од размената на затвореници од страна на милитантното движење Хезболах. Војниците Елдад Регев и Ехуд Голтвасер се верува дека загинале кога влегле во заседа во 2006 година. Овој инцидент ја поттикна едномесечната војна меѓу Израел и Хезболах. Во размената за враќање на нивните тела, Израел ослободи петмина либански затвореници, а ги предаде и останките од 200 либански и палестински борци. Илјадници лица присуствуваа на погребот на Голтвасер, кој беше извршен на воените гробишта во неговиот роден град Нахарија во северниот дел на Израел. Регев вчера попладне беше погребан во воениот дел на гробиштата во Хаифа.
Израелската армија чувствува обврска да ги врати дома сите свои војници. Меѓутоа, размената што се случи во средата беше контроверзна во Израел, бидејќи со неа беше ослободен осудениот убиец Самир Кантар. Војниците имаа пурпурни беретки додека го носеа ковчегот на Голтвасер кој беше покриен со израелското знаме. Израелски официјални лица изјавија дека Голтвасер починал од раната во градите предизвикана од ракетна граната кога возилото во кое биле тој и Регев влегло во заседа, објави весникот "Ерусалим пост". Регев, исто така, бил повреден од експлозијата пред да биде застрелан во главата, објави весникот.
Во меѓувреме, останките на вратените либански и палестински борци се пренесени до либанскиот главен град Бејрут со триумфална погребна церемонија. Во средата лидерот на Хезболах Хасан Насралах лично им посака добредојде дома на петтемина м��литанти ослободени од страна на Израел. На големиот собир во Бејрут шеикот Насралах изјави дека "времето на порази" е завршено. Дописникот на Би-Би-Си од Бејрут јави дека размената на затвореници се смета за триумф од страна на симпатизерите и опонентите на Хезболах. (Би-Би-Си) |
