Првпат во светот на избори ќе се гласа преку мобилен телефон
Талин- Естонија би можела да биде првата земја во светот во која избирачите ќе можат да гласаат преку мобилни телефони, пишува естонскиот дневен весник "Постимес".
Министерството за правда во Талин го презентираше законскиот предлог според кој мобилни телефони би можеле да се користат на изборите во Естонија за ЕУ-парламентот и на локалните избори во 2009 година.
Прашањето за гласање преку мобилни телефони е проследено со отворен политички судир. Зад предлогот застана владејачката Реформска партија, која постигна големи успеси меѓу помладите избирачи на минатогодишните парламентарни избори во Естонија.
Опозициската Партија на центарот, за која вообичаено гласаат постари избирачи, смета дека Реформската партија ги користи промените во изборниот законик со цел да освои поголем број гласови на изборите, затоа што се очекува преку мобилните телефони најмногу да гласаат млади Естонци.
Гласање преку Интернет е веќе воведено во Естонија, а сега се очекува, според новиот законски предлог, да се продолжи во траење од три на десет дена. (МИА) |
