Претходен број

Саркози и' дал орден на судијката што го разведе

Орден на честа добил и човекот што го запозна Саркози со Карла Бруни

Брисел - Францускиот претседател Николас Саркози не престанува да шокира со уникатниот стил на водење на политиката, но она што го направи деновиве излегува и од тие рамки веќе прифатливи за Франција. Како што објави француски „Либерасион“, претседателот неодамна ја наградил со Орден на честа судијката Никол Шубрак чијашто единствена заслуга е што го разведе во дискреција од претходната жена Сесилија, но не застанал тука, па му дал ист орден и на Жак Сегуела, кој ја организирал славната средба на Саркози со Карла Бруни, сегашната сопруга.

Судијката Шубрак, и самата изненадена од признанието, изјави за медиумите дека претседателот очигледно го цени тоа што го премолчела разводот пред медиумите, со додавка дека господ знае колку тоа било тешко и колку била напаѓана од новинарите. Инаку, Орденот на честа е највисок орден на Франција, а пред неколку дена претседателот Саркози лично и' го врачи истото признание на Ингрид Бетанкур, како признание за силата што ја покажа преживувајќи ја десетгодишната голгота во заточеништво. (С.Ј.)