Прв лауреат Меси, Чави или Роналдо
Аргентинецот Лионел Меси, Шпанецот Чави Ернандез или Португалецот Кристијано Роналдо? - Тоа се тројцата кандидати за инаугуралното признание „Најдобар фудбалер во Европа“ што ќе го додели УЕФА. Наградата ќе му биде врачена на еден од нив на свечена церемонија на 25 август во Монте Карло за време на ждрепката на групите за фудбалската Лига на шампиони во сезоната 2011/12.
Меси лани постигна 53 гола во сите натпреварувања, а тој и Чави ја предводеа Барселона до шампионските титули во Шпанија и Европа. Напаѓачот на мадридски Реал, Роналдо, со 40 погодоци на првенствени натпревари во една сезона, пак, постави рекорд во шпанска Примера.
Во гласањето за најдобар фудбалер во Европа ќе учествува по еден новинар од секоја од 53 земји-членки на УЕФА. |
