Македонија втора во Птуј
По поразот од домаќинот Словенија, кошаркарите ја совладаа Полска со 66:57 на турнирот „Примус“
Роберт Димитриевски
Машката кошаркарска репрезентација на Македонија го освои второто место на турнирот „Примус“ во словенечкиот град Птуј. По поразот од победникот на турнирот Словенија со 83:71 на стартот, избраниците на селекторот Марин Докузовски славеа со 66:57 против Полска, која претходно изгуби од домаќинот со 69:54.
И втората средба во подготвителниот период црвено-жолтите ја одиграа без плејмејкерот Бо Лестер Мекејлеб и центарот Тодор Гечевски, кои на националниот тим треба да му се приклучат деновиве во италијанскиот зимски центар Бормио. Организаторот на последното Европско првенство, пак, извади подмладен состав, во кој го немаше најдобриот полски кошаркар Марчин Гортат.
Македонија фуриозно го отвори натпреварот, поведувајќи со 10:0, разлика што не беше доведена во прашање во ниту еден момент. За разлика од дуелот со Словенците, кога одлично функционираше ударот од далечина, овој пат македонските кошаркари остварија само 25 проценти реализација за тројка. Надомести играта во одбрана, посебно под обрачите, каде што царуваа Предраг Самарџиски и Перо Антиќ. Самарџиски беше најефикасен поединец на средбата со 14 коша, на кои додаде пет скока, а Антиќ беше втор стрелец со 11 поени, но и со само една тројка од девет обиди.
Следна проверка во пресрет на ЕП во Литванија најдобрите македонски кошаркари ќе имаат на турнирот во Бормио в петок и во сабота, на кој ќе учествуваат и Канада, Бугарија и домаќинот Италија.
Македонија - Полска 66:57
По четвртини: 18:10, 13:15, 18:18, 17:13. Сала: „Градски врт“ во Птуј. Гледачи: 400. Судии: Колар, Креич и Пур од Словенија.
Македонија: Мираковски 6, Илиевски 2, Соколов 6, Стефанов, В. Стојановски 6, Д. Стојановски 7, Костоски, Симоновски 3, Антиќ 11, Николовски 4, Чековски 7, Самарџиски 14. Селектор: Марин Докузовски.
Полска: Лапета 4, Шибниевски 4, Снјег 2, Памула 4, Леончук 4, Кулиг 2, Вишневски 8, Габински 8, Шчотка 9, Вашчински 5, Мокрош 1, Хричаник 8. Селектор: Алеш Пипан. |
