А1: Нема реклами, нема ни програма

Телевизијата протестира со црн екран поради одлука на Советот за радиодифузија

По 24-часовен целосен прекин на програмата, А1 телевизија вчера протестираше против одлуката на Советот за радиодифузија за целодневна забрана за емитување реклами. Од А1 велат дека одлуката за ваквата казна ја оценуваат како дел од низата притисоци на власта, но СРД смета дека ова е самоволен потег и провокација, бидејќи казната е донесена од поодамна.

„Советот е изненаден од постапката на А1 телевизија да престане да емитува програма. Мерката на која се повикуваат е изречена за време на предизборниот период поради прекршување на Законот за радиодифузна дејност во однос на надминување на лимитот за рекламирање. Тогаш Советот и' наложи на А1 во текот на еден ден да не емитува реклами и телешопинг и затоа сметаме дека овој целосен прекин на програмата е самоволен потег и отворена провокација на оваа телевизија“, реагира првиот човек на СРД, Зоран Стефаноски. Шпекулациите дека казната е изречена поради емитувањето спотови со критички содржини за владејачката партија што одат на А1, според Стефаноски, се чиста манипулација што воопшто нема никаква поврзаност со одлука донесена пред две години.

„Уште еднаш ги потсетуваме и ги предупредуваме сите радиодифузери стриктно да се придржуваат до одредбите на Законот и подзаконските акти и да не дозволат во политичко рекламирање да има учество и прикажување малолетници ниту какви било форми во кои не се почитува човековото достоинство“, напомнуваат од СРД.

Сопственикот на А1, Велија Рамковски, не негира дека одлуката има постар датум, за која и тие интервенирале во СРД за да се укине.

„Раководните луѓе од телевизијата повеќе пати бараа од Советот да ја сфати состојбата во која се наоѓа А1. Ние се наоѓаме во нелојална конкуренција и цели две години, 2009 и 2010, сме во незавидна финансиска положба поради конкуренција од Сител и од Канал 5, кои на директен начин добиваат пари од власта. Приходите на А1 се намалени речиси за 50 проценти и затоа баравме разбирање од Советот, но не најдовме. Тие останаа на својата одлука и ова е само притисок на Груевски, кој ја анатемизира телевизијата на јавни собири. А1 е притисната од власта“, вели сопственикот Рамковски. Одлуката да емитуваат црн екран, тој ја образложува со тоа што не гледа причина да емитува програма без реклами.

„Ако имаме решение за забрана за емитување реклами, јас тогаш не гледам зошто би емитувале и програма. Нема никаква потреба, па затоа 24 часа ќе стои црн екран“, ни изјави Рамковски. (Св.У.)